తెలంగాణలో ఎండలు తీవ్రరూపం దాల్చాయి. టీఎస్‌డీపీఎస్‌ డేటా ప్రకారం నిర్మల్‌ జిల్లా దిలావర్‌పూర్‌లో 46.5 డిగ్రీల సెల్సియస్‌ ఉష్ణోగ్రత నమోదైంది. ఉత్తర, తూర్పు తెలంగాణ జిల్లాల్లో వడగాలుల ప్రభావం తీవ్రంగా కనిపిస్తోంది.

Telangana Heatwave: Summer Temperatures Touch 46.5°C, Nirmal Records Season's Highest

విధాత తెలంగాణ డెస్క్​ | మే 20, 2026:

Telangana Heatwave | హైదరాబాద్‌: తెలంగాణలో ఎండలు మళ్లీ భగభగలాడుతున్నాయి. రాష్ట్రంలోని పలు జిల్లాల్లో బుధవారం ఉష్ణోగ్రతలు 46 డిగ్రీల సెల్సియస్‌ను దాటాయి. తెలంగాణ అభివృద్ధి ప్రణాళికా సంఘం - టీఎస్‌డీపీఎస్‌ సమాచారం ప్రకారం, ఈ వేసవి సీజన్‌లోనే అత్యధికంగా నిర్మల్‌ జిల్లా దిలావర్‌పూర్‌లో 46.5 డిగ్రీల సెల్సియస్‌ ఉష్ణోగ్రత నమోదైంది.

రాష్ట్రంలోని ఉత్తర, తూర్పు జిల్లాల్లో వడగాలుల తీవ్రత ఎక్కువగా కనిపించింది. హనుమకొండ జిల్లా ధర్మసాగర్‌, కరీంనగర్‌ జిల్లా చొప్పదండి, పెద్దపల్లి జిల్లా ఓదెలలో 46.4 డిగ్రీల సెల్సియస్‌ చొప్పున ఉష్ణోగ్రతలు నమోదయ్యాయి. జగిత్యాల జిల్లా రాయికల్‌, జనగామ జిల్లా వడ్లకొండ, ఖమ్మం జిల్లా పెనుబల్లి ప్రాంతాల్లో 46.3 డిగ్రీల సెల్సియస్‌ నమోదుకాగా, సిద్ధిపేట జిల్లా కోహెడలో 46.2 డిగ్రీల సెల్సియస్‌ ఉష్ణోగ్రత నమోదైంది.

వాతావరణ పరిస్థితులను గమనిస్తున్న తెలంగాణ వెదర్​మ్యాన్​ లాంటి స్వతంత్ర వాతావరణ పరిశీలకులు కూడా రాష్ట్రంలో తీవ్ర ఉష్ణోగ్రతల పెరుగుదలను గుర్తించారు. మధ్య భారతదేశం, దక్షిణాది ప్రాంతాలపై కొనసాగుతున్న వేడి గాలుల ప్రభావం తెలంగాణపై స్పష్టంగా కనిపిస్తోందని వారు పేర్కొంటున్నారు. ముఖ్యంగా ఉత్తర, తూర్పు తెలంగాణ జిల్లాల్లో ఎండ తీవ్రత ప్రజలను బాగా ఇబ్బందులకు గురిచేస్తోంది.

భారత వాతావరణ శాఖ హైదరాబాద్‌ విభాగం కూడా రాష్ట్రంలోని పలు జిల్లాల్లో వడగాలుల పరిస్థితులు కొనసాగుతున్నాయని తెలిపింది. ఉత్తర, తూర్పు జిల్లాల్లో ఉష్ణోగ్రతలు 44 డిగ్రీల సెల్సియస్‌కు పైగా నమోదయ్యే అవకాశం ఉందని, మిగతా జిల్లాల్లోనూ 41 నుంచి 44 డిగ్రీల మధ్య ఉష్ణోగ్రతలు ఉండొచ్చని అంచనా వేసింది.

టీఎస్‌డీపీఎస్‌ డేటా, ఐఎండీ అంచనాలు, స్థానిక వాతావరణ పరిశీలకుల వివరాలు చూస్తే.. తెలంగాణలో ఈ వేసవి మరింత కఠినంగా మారుతున్న సంకేతాలు కనిపిస్తున్నాయి. గత కొన్ని రోజులుగా పెరుగుతున్న ఎండలతో మధ్యాహ్నం సమయంలో బయటకు వెళ్లడం ప్రజలకు కష్టంగా మారింది. రోడ్లపై ఎటు చూసినా కర్ఫ్యూ వాతావరణం కనిపిస్తోంది.

తీవ్ర ఎండల మధ్య విధులు నిర్వహిస్తున్న ట్రాఫిక్‌ సిబ్బంది తరచూ నీరు తాగుతూ జాగ్రత్తలు తీసుకుంటున్నారు.

ఈ వేసవిలో తొలిసారి రాష్ట్రంలో 46.5 డిగ్రీల సెల్సియస్‌ గరిష్ఠ ఉష్ణోగ్రత నమోదైంది. టీఎస్‌డీపీఎస్‌ డేటా ప్రకారం అత్యధిక ఉష్ణోగ్రతలు నమోదైన ప్రాంతాలు ఇవి:

ఉష్ణోగ్రతలు ఈ స్థాయికి చేరిన నేపథ్యంలో ప్రజలు అప్రమత్తంగా ఉండాలని వైద్యులు సూచిస్తున్నారు. మధ్యాహ్నం సమయంలో అనవసరంగా బయటకు వెళ్లకుండా ఉండటం, తగినంత నీరు తాగడం, వృద్ధులు, చిన్నారులు, దీర్ఘకాలిక వ్యాధులతో బాధపడేవారు ప్రత్యేక జాగ్రత్తలు తీసుకోవడం అవసరమని చెబుతున్నారు.

ఎండ తీవ్రత నేపథ్యంలో ప్రజలు మధ్యాహ్నం వేళల్లో బయటకు రావొద్దని సీఎం రేవంత్‌ రెడ్డి సూచించారు.