మేరీల్యాండ్‌లోని Joint Base Andrewsలో జరిగిన కార్యక్రమంలో నేవీ బ్లూ, ఎరుపు, తెలుపు రంగుల్లో మెరిసిపోతున్న ఈ భారీ బోయింగ్​ 747-8ఐ విమానాన్ని ప్రపంచానికి చూపించారు. "ఇది ఎగిరే వైట్‌హౌస్‌. ప్రపంచంలోనే అత్యంత విలాసవంతమైన విమానం" అని ట్రంప్‌ వ్యాఖ్యానించారు.

తోకపై రెపరెపలాడే భారీ అమెరికా పతాకం, అధ్యక్ష ముద్ర, కొత్త రంగుల డిజైన్‌ వెంటనే అందరి దృష్టిని ఆకర్షించాయి. కానీ ఈ విమానం వెనుక ఉన్న అసలు కథ విలాసం గురించి కాదు. ఖతార్‌ నుంచి ఉచితంగా వచ్చిన ఒక జంబో జెట్‌ను అమెరికా అధ్యక్షుడి అత్యంత సురక్షితమైన అత్యాధునిక కమాండ్‌ కంట్రోల్​ సెంటర్‌గా మార్చే ప్రక్రియ గురించే.

హ్యాంగర్‌లో కనిపిస్తున్న కొత్త ఎయిర్‌ఫోర్స్‌ వన్‌ ముందు భాగం

ప్రస్తుతం ట్రంప్‌ ఉపయోగించబోయే ఈ విమానం ఖతార్‌ రాజకుటుంబం కోసం ప్రత్యేకంగా రూపొందించిన Boeing 747-8 Intercontinental VVIP జెట్‌. దీని విలువ సుమారు 400 మిలియన్‌ డాలర్లు, అంటే భారత కరెన్సీలో దాదాపు రూ.3,400 కోట్లు.
బోయింగ్​(Boeing) నుంచి రావాల్సిన కొత్త VC-25B Air Force One విమానాలు 2024లోనే సేవలందించాల్సిఉన్నా, భారీ ఆలస్యాల కారణంగా అవి 2028కు వాయిదా పడ్డాయి. దీంతో తాత్కాలిక పరిష్కారంగా ఈ ఖతారీ విమానాన్ని "తాత్కాలికంగా" ఉపయోగించాలని అమెరికా నిర్ణయించింది. అంటే ఇది శాశ్వత Air Force One కాదు. అసలు అధ్యక్ష విమానాలు వచ్చే వరకు ఉపయోగించే మధ్యంతర విమానం మాత్రమే.

అయితే ఈ నిర్ణయం వివాదాలకు కూడా దారితీసింది. విదేశీ ప్రభుత్వం నుంచి ఇంత ఖరీదైన విమానాన్ని బహుమతిగా స్వీకరించడం నైతికంగా సరైందేనా అనే ప్రశ్నలు అమెరికాలో తలెత్తాయి. అయితే ట్రంప్‌ మాత్రం "ఉచితంగా వస్తున్న విమానాన్ని వద్దనడం మూర్ఖత్వం" అంటూ విమర్శలను కొట్టిపారేశారు.

హ్యాంగర్‌లో ప్రదర్శనకు ఉంచిన కొత్త ఎయిర్‌ఫోర్స్‌ వన్‌ విమానం

ప్రస్తుతం అమెరికా అధ్యక్షుడి కోసం ఉపయోగిస్తున్న VC-25A విమానాలు Boeing 747-200B ఆధారంగా రూపొందించబడి 1990 నుంచి సేవలందిస్తున్నాయి. జార్జ్‌ హెచ్‌.డబ్ల్యూ. బుష్‌ నుంచి జో బైడెన్‌ వరకు అనేక మంది అధ్యక్షులు వీటిలోనే ప్రయాణించారు.

కొత్త Boeing 747-8 మాత్రం వాటికంటే గణనీయంగా పెద్దది. పాత VC-25A పొడవు 231.8 అడుగులు కాగా, కొత్త విమానం పొడవు 250.2 అడుగులు. అంటే దాదాపు 18 అడుగులకుపైగా ఎక్కువ. రెక్కల విస్తీర్ణం పెద్దది, గరిష్ఠ బరువు మోయగల సామర్థ్యం ఎక్కువ, ప్రయాణ దూరం (range) కూడా ఎక్కువ. ఇందులోని GEnx-2B ఇంజిన్లు పాత CF6 ఇంజిన్లతో పోలిస్తే మరింత ఇంధన పొదుపు, మెరుగైన పనితీరును అందిస్తాయి.

సాధారణంగా చెప్పాలంటే, పాత Air Force One 1990ల టెక్నాలజీ అయితే, కొత్త Boeing 747-8 ఇరవై ఒకటో శతాబ్దపు జంబో జెట్‌.

కొత్త ఎయిర్‌ఫోర్స్‌ వన్‌లోని టాప్​ క్లాస్‌ క్యాబిన్‌

కొత్త ఎయిర్‌ఫోర్స్‌ వన్‌లోని ప్రైవేట్‌ మీటింగ్‌ రూమ్‌

కొత్త ఎయిర్‌ఫోర్స్‌ వన్‌లోని ప్రధాన లాంజ్‌ క్యాబిన్‌

కొత్త ఎయిర్‌ఫోర్స్‌ వన్‌లోని బెడ్‌రూమ్‌ సూట్‌

కొత్త ఎయిర్‌ఫోర్స్‌ వన్‌లోని ఆఫీసర్స్​ సీటింగ్‌ క్యాబిన్‌

Air Force Oneను కేవలం అధ్యక్షుడి ప్రయాణ విమానం అనుకోవడం పొరపాటు. ఇది ఒక మొబైల్‌ వైట్‌హౌస్‌, ఒక యుద్ధ నియంత్రణ కేంద్రం, ఒక అత్యవసర జాతీయ కమాండ్‌ సెంటర్‌.

విమానంలో అధ్యక్షుడి ప్రత్యేక సూట్‌, కార్యాలయం, సమావేశ మందిరాలు, మీడియా విభాగం, సీనియర్‌ అధికారుల పని ప్రదేశాలు, వైద్య విభాగం ఉంటాయి. రెండు భారీ గ్యాలీల ద్వారా ఒకేసారి దాదాపు 100 మందికి భోజనం అందించే సామర్థ్యం కూడా దీని సొంతం. అధ్యక్షుడు ప్రపంచంలో ఎక్కడ ఉన్నా దేశ భద్రతా వ్యవస్థలతో నిరంతరం అనుసంధానంగా ఉండేందుకు అత్యాధునిక కమ్యూనికేషన్‌ వ్యవస్థలను అమర్చారు.

ఈ విమానం మొదట ఖతార్‌ రాజకుటుంబం కోసం రూపొందించబడింది. అందుకే ఇందులో ఉన్న విలాసం సాధారణ ప్రభుత్వ విమానాల్లో కనిపించదు. విమానంలో-

• ప్రీమియం లెదర్‌ సీట్లు
• విలాసవంతమైన సోఫాలు
• ఖరీదైన కలప ప్యానెలింగ్‌
• విశాలమైన లౌంజ్‌లు
• వ్యక్తిగత గదులు, సమావేశ మందిరాలు

ఆసక్తికరమైన విషయం ఏమిటంటే, భద్రతా మార్పులు చేసినప్పటికీ అసలు ఇంటీరియర్‌లో ఎక్కువ భాగం అలాగే ఉంచినట్లు అమెరికా వైమానిక దళం తెలిపింది.

విలాసవంతమైన VVIP విమానాన్ని పూర్తిస్థాయి Air Force Oneగా మార్చడం అంత సులభం కాదు. పాత Air Force Oneలో అణుదాడిని తట్టుకునే EMP (Electromagnetic Pulse) రక్షణ వ్యవస్థలు ఉన్నాయి. అణు పేలుడు తర్వాత ఉత్పన్నమయ్యే విద్యుదయస్కాంత తరంగాలు విమానం ఎలక్ట్రానిక్‌ వ్యవస్థలను దెబ్బతీయకుండా ప్రత్యేక కవచం అమర్చారు.

పాత VC-25Aలో దాదాపు 238 మైళ్ల వైరింగ్‌ను ప్రత్యేక షీల్డింగ్‌తో రక్షించారు. కిటికీల్లో కూడా సూక్ష్మ లోహపు రక్షణ వలలు ఉన్నాయి. అదే స్థాయి భద్రతను ఈ ఖతారీ విమానంలో అమర్చాలంటే పూర్తిస్థాయి రీవైరింగ్‌, కొత్త కమ్యూనికేషన్‌ వ్యవస్థలు, ప్రత్యేక డేటా సెంటర్లు, ఎన్‌క్రిప్షన్‌ మాడ్యూళ్లు, యాంటెన్నా వ్యవస్థలు అవసరం.

కొందరు రక్షణ నిపుణుల అంచనాల ప్రకారం ఈ మార్పుల ఖర్చు 1 బిలియన్‌ డాలర్లకు, అంటే రూ.8,000 కోట్లకు పైగా చేరవచ్చు. వైమానిక దళం మాత్రం ఇది అంతకంటే తక్కువే అవుతుందని చెబుతోంది.

రాచఠీవీతో ఆకాశంలో ప్రయాణిస్తున్న పాత ఎయిర్‌ఫోర్స్‌ వన్‌ బోయింగ్‌ 747

పాత Air Force One విమానాల అత్యంత ప్రత్యేకమైన ఫీచర్లలో ఒకటి గాల్లోనే ఇంధనం నింపుకోవడం. Air-to-Air Refuelling ద్వారా విమానం చాలాకాలం పాటు గాల్లోనే ఉండగలదు. జాతీయ అత్యవసర పరిస్థితుల్లో అధ్యక్షుడిని సురక్షితంగా ఉంచేందుకు ఇది కీలక సామర్థ్యంగా పరిగణిస్తారు.

కొత్త ఖతారీ Boeing 747-8లో మాత్రం ఈ ఫీచర్‌ లేదు. ఇది ఆడంబరంలో ముందుండొచ్చు, పరిమాణంలో పెద్దదై ఉండొచ్చు. కానీ వ్యూహాత్మకంగా చూస్తే పాత Air Force Oneలో ఉన్న కొన్ని ప్రత్యేక సామర్థ్యాలు ఇందులో కనిపించవు.

ఎయిర్​ ఫోర్స్​ వన్​ భద్రత సాధారణ ప్రయాణికుల విమానాలకు పూర్తిగా భిన్నం. పాత విమానాల్లో-

• Missile Warning Systems (క్షిపణి హెచ్చరిక వ్యవస్థలు)
• Infrared Jammers (ఇన్‌ఫ్రారెడ్‌ జామర్లు)
• DIRCM Systems (లేజర్‌ ఆధారిత రక్షణ)
• Chaff & Flare Countermeasures

ఇవి శత్రు క్షిపణులను గుర్తించి, వాటిని తప్పుదోవ పట్టించేందుకు ఉపయోగపడతాయి. కొత్త విమానంలో కూడా భద్రతా అప్‌గ్రేడ్లు చేశారు. అయితే పాత VC-25A స్థాయి రక్షణ వ్యవస్థలన్నీ ఇప్పటికే అమర్చారా లేదా అన్నది ఇంకా పూర్తిగా స్పష్టంగా లేదు.

డొనాల్డ్‌ ట్రంప్‌ ప్రైవేట్‌ బోయింగ్‌ 757 విమానం

1962లో జాన్‌ ఎఫ్‌. కెన్నెడీ హయాంలో రూపొందించిన లేత నీలం-తెలుపు రంగుల Air Force One ప్రపంచంలోనే అత్యంత గుర్తింపు పొందిన విమాన డిజైన్లలో ఒకటి. ట్రంప్‌ మాత్రం ఆ డిజైన్‌ను మార్చేశారు. కొత్త విమానంలో-

• ముదురు నీలం దిగువ భాగం
• ఎరుపు చార
• భారీ అమెరికా జెండా
• బంగారు టచ్‌

ఇది ట్రంప్‌ వ్యక్తిగత Boeing 757 విమానాన్ని తలపిస్తుంది.

కొత్త ఎయిర్‌ఫోర్స్‌ వన్‌ మెట్లపై ఫోజులిస్తున్న డొనాల్డ్‌ ట్రంప్‌

ఈ ప్రశ్నకు సమాధానం రెండు విధాలుగా చెప్పవచ్చు. విలాసం పరంగా చూస్తే అవును. పరిమాణం పరంగా చూస్తే అవును. ఆధునికత, ఇంధన సామర్థ్యం పరంగా చూస్తే అవును.