అయితే, ఈ భేటీలో భారత పురుషుల టీ20 తదుపరి కెప్టెన్సీ అంశాన్ని అధికారికంగా చర్చిస్తారా? లేదా? అనే దానిపై ఇంకా స్పష్టత రాలేదని బోర్డు వర్గాలు తెలిపాయి. రాబోయే రెండేళ్ల ప్రణాళికలతో పాటు 2028లో డిఫెండింగ్ ఛాంపియన్‌గా బరిలోకి దిగబోయే టీ20 వరల్డ్ కప్, లాస్ ఏంజిలెస్ ఒలింపిక్స్‌ను దృష్టిలో ఉంచుకుని బీసీసీఐ సరికొత్త వ్యూహాలు రచిస్తోంది.

2024లో రోహిత్ శర్మ టీ20ల నుంచి రిటైర్ అయిన తర్వాత సూర్య కుమార్‌కు సారథ్య బాధ్యతలు అప్పగించారు. కానీ, గత కొంతకాలంగా సూర్య కుమార్ యాదవ్ ఎదుర్కొంటున్న సుదీర్ఘ ఫామ్ లేమి ఇప్పుడు అజిత్ అగార్కర్ నేతృత్వంలోని సెలెక్షన్ కమిటీకి, గౌతమ్ గంభీర్ హెడ్ కోచ్‌గా ఉన్న టీమ్ మేనేజ్‌మెంట్‌కు పెద్ద తలనొప్పిగా మారింది.

ఇటీవల ముగిసిన ఐపీఎల్ 2026 సీజనులో ముంబై ఇండియన్స్ తరపున ఆడిన సూర్య... 13 ఇన్నింగ్స్‌లో కేవలం 20.76 సగటుతో 270 పరుగులు మాత్రమే చేయగలిగాడు. అతడి వైఫల్యం వల్ల ఐపీఎల్‌లో ముంబై 9వ స్థానంతో సరిపెట్టుకోవాల్సి వచ్చింది. అంతకుముందు జరిగిన టీ20 వరల్డ్ కప్‌లోనూ, అలాగే ప్రస్తుతం జరుగుతున్న ముంబై టీ20 లీగ్‌లోనూ సూర్య బ్యాట్‌తో ఘోరంగా తడబడ్డాడు.