ابوظبی: وزیر اعظم نریندر مودی نے متحدہ عرب امارات کے صدر شیخ محمد بن زاید النہیان کے ساتھ دو طرفہ ملاقات کے دوران کہا کہ ہندستان ہر صورتحال میں یو اے ای کے شانہ بشانہ کھڑا ہے۔ انہوں نے مغربی ایشیا میں بڑھتی ہوئی علاقائی کشیدگی کے درمیان متحدہ عرب امارات کی مکمل حمایت کا اعادہ کیا۔
وزیر اعظم مودی نے یو اے ای کو اپنا "دوسرا گھر" قرار دیتے ہوئے پرتپاک استقبال پر شکریہ ادا کیا۔ انہوں نے کہا کہ یو اے ای فضائیہ کے جنگی طیاروں کی جانب سے ان کے طیارے کو دی گئی اسکواڈرن سلامی ہندستانی عوام کے لیے باعث فخر ہے۔
مودی نے اتر پردیش میں حالیہ قدرتی آفت پر یو اے ای قیادت کی جانب سے اظہار تعزیت پر بھی شکریہ ادا کیا اور کہا کہ وہ صدر شیخ محمد بن زاید سے ملاقات کے خواہشمند تھے۔
انہوں نے یو اے ای پر ہونے والے حملوں کی سخت مذمت کرتے ہوئے کہا کہ "یو اے ای کو جس طرح نشانہ بنایا گیا وہ کسی بھی صورت قابل قبول نہیں ہے۔"
وزیر اعظم مودی نے مشکل حالات میں یو اے ای قیادت کے تحمل، جرات اور دانشمندی کی تعریف کرتے ہوئے کہا کہ قومی اتحاد، سلامتی اور علاقائی استحکام برقرار رکھنے کے لیے کیے گئے اقدامات قابل ستائش ہیں۔
انہوں نے یو اے ای حکومت اور شاہی خاندان کا وہاں مقیم ہندستانی برادری کی دیکھ بھال اور تعاون پر خصوصی شکریہ ادا کیا۔ مودی نے کہا کہ مشکل وقت میں ہندستانی برادری کے ساتھ خاندان کے افراد جیسا سلوک کیا گیا۔
مغربی ایشیا کی صورتحال پر بات کرتے ہوئے وزیر اعظم مودی نے کہا کہ جاری تنازع کے اثرات پوری دنیا پر پڑ رہے ہیں اور ہندستان ہمیشہ مسائل کے حل کے لیے بات چیت اور سفارت کاری کو ترجیح دیتا ہے۔
انہوں نے آبنائے ہرمز کو محفوظ، کھلا اور آزاد رکھنے کی ضرورت پر زور دیتے ہوئے کہا کہ اس سلسلے میں بین الاقوامی قوانین کی پابندی انتہائی ضروری ہے۔
مودی نے کہا کہ موجودہ حالات میں ہندستان اور یو اے ای کی جامع اسٹریٹجک شراکت داری کی اہمیت کئی گنا بڑھ گئی ہے۔ انہوں نے کہا کہ دونوں ممالک مختلف شعبوں میں تیزی سے تعاون کو آگے بڑھا رہے ہیں اور مستقبل میں بھی ہر میدان میں ساتھ مل کر کام جاری رکھیں گے۔