نئی دہلیوَزارتِ تجارت کے سکریٹری راجیش اگروال نے جمعہ کو کہا کہ امریکی وفد کے اگلے مہینے ہندوستان آنے کا امکان ہے، تاہم ابھی ان کی آمد کی تاریخ طے نہیں ہوئی ہے۔ہندوستانی وفد اپریل میں واشنگٹن گیا تھا، جہاں امریکی حکام کے ساتھ ملاقات کر کے عبوری تجارتی معاہدے کی تفصیلات کو حتمی شکل دینے اور جامع دوطرفہ تجارتی معاہدے (بی ٹی اے) کے تحت مذاکرات کو آگے بڑھانے پر تبادلۂ خیال کیا گیا تھا۔ سکریٹری نے صحافیوں سے کہا کہ ہمیں امید ہے کہ امریکی وفد جلد آئے گا۔ اس مہینے نہیں، شاید اگلے مہینے آئے گا...۔ انہوں نے کہا کہ ہندوستان، امریکہ کے ساتھ تجارتی معاہدے پر بات چیت کر رہا ہے اور مناسب وقت پر اس پر دستخط کیے جائیں گے۔ ساتھ ہی، ہندوستان دفعہ-301 کے تحت جاری جانچ کے معاملے پر بھی امریکہ سے بات چیت کر رہا ہے۔ہندوستان اور امریکہ نے سات فروری کو ایک مشترکہ بیان جاری کر کے باہمی طور پر فائدہ مند تجارت کے لیے عبوری تجارتی معاہدے کے خاکے کو حتمی شکل دینے کا اعلان کیا تھا۔ گزشتہ مالی سال 2025-26 کے دوران امریکہ کو ہندوستان کی برآمدات 0.92 فیصد بڑھ کر 87.3 ارب ڈالر ہو گئیں، جبکہ درآمدات میں 15.95 فیصد اضافہ ہوا اور یہ 52.9 ارب امریکی ڈالر تک پہنچ گئیں۔ تجارتی فاضل 40.89 ارب ڈالر سے کم ہو کر 34.4 ارب ڈالر رہ گیا۔