نئی دہلیسپریم کورٹ نے پیر کے روز نارکو دہشت گردی کے ایک معاملے میں مقدمے کا سامنا کر رہے ایک شخص کو یہ کہتے ہوئے ضمانت دے دی کہ ضمانت اصول ہے اور جیل استثنا، اور یہی اصول یو اے پی اے کے معاملات میں بھی لاگو ہوتا ہے۔ اس شخص پر جموں و کشمیر میں منشیات کی اسمگلنگ اور دہشت گردی کی مالی معاونت میں ملوث سرحد پار گروہ کے ساتھ تعلقات رکھنے کے الزامات ہیں۔جسٹس بی وی ناگرتنا اور جسٹس اجل بھوئیاں کی بنچ نے ہندواڑہ کے رہائشی سید افتخار اندرابی کو راحت دیتے ہوئے اسے اپنا پاسپورٹ جمع کرانے اور ہر 15 دن میں ایک بار مقامی تھانے میں حاضری دینے کی ہدایت دی۔ نیشنل انویسٹی گیشن ایجنسی (این آئی اے) غیر قانونی سرگرمیاں (روک تھام) قانون اور انڈین پینل کوڈ (آئی پی سی) کی متعلقہ دفعات کے تحت 2020 میں درج مقدمے کی جانچ کر رہی ہے۔ سپریم کورٹ نے کہا کہ یو اے پی اے کی دفعہ 43 ڈی (5) غیر معینہ مدت تک قید کو جائز قرار نہیں دے سکتی اور اس کا اطلاق آئین کے آرٹیکل 21 اور 22 کے تحت ہی ہونا چاہیے۔ یہ دفعہ ضمانت سے متعلق سخت پابندیاں عائد کرتی ہے۔بنچ نے کہا کہ ضمانت اصول ہے اور قید استثنا۔ یہ آئین کے آرٹیکل 21 اور 22 سے اخذ کردہ ایک آئینی اصول ہے اور بے گناہی کا تصور قانون کی حکمرانی والے کسی بھی مہذب معاشرے کی بنیاد ہے۔ سپریم کورٹ نے واضح کیا کہ کے اے نجیب معاملے میں اس کا فیصلہ ایک پابند قانون ہے اور ماتحت عدالتیں، ہائی کورٹیں یا حتیٰ کہ سپریم کورٹ کی ماتحت بنچیں بھی اسے کمزور، نظرانداز یا مسترد نہیں کر سکتیں۔کے اے نجیب معاملہ یو اے پی اے کے تحت ضمانت سے متعلق 2021 میں سپریم کورٹ کا ایک اہم تاریخی فیصلہ ہے۔ اندرابی نے جموں و کشمیر اور لداخ ہائی کورٹ کے اُس حکم کو چیلنج کیا تھا، جس میں اس کی ضمانت کی درخواست مسترد کر دی گئی تھی۔ ہائی کورٹ نے کہا تھا کہ موبائل فون ریکارڈ کی جانچ سے ظاہر ہوتا ہے کہ اندرابی سرحد پار دہشت گرد تنظیموں کے رابطے میں تھا۔ سال 2020 میں درج اس معاملے کی جانچ این آئی اے کر رہی ہے۔ یہ تفتیش غیر قانونی سرگرمیاں (روک تھام) قانون اور انڈین پینل کوڈ کی مختلف دفعات کے تحت کی جا رہی ہے۔