ممبئی فلم "بندر" کا آفیشل ٹریلر جمعرات کو جاری کر دیا گیا، جس میں بوبی دیول مرکزی کردار میں نظر آ رہے ہیں۔ یہ ایک زبردست کرائم تھرلر فلم ہے جس کی ہدایت کاری انوراگ کشیپ نے کی ہے۔یہ فلم فلم ساز انوراگ کشیپ اور اداکار بوبی دیول کے درمیان پہلا اشتراک ہے اور 5 جون کو پورے ہندوستان کے سینما گھروں میں ریلیز ہوگی۔ ٹریلر میں بوبی دیول سمر مہرا کے کردار میں دکھائی دیتے ہیں، جو ایک مشہور ٹی وی سپر اسٹار ہے لیکن اس کی شہرت آہستہ آہستہ ماند پڑ رہی ہے۔ وہ شہرت، تنہائی اور اپنی رنگین مزاج عوامی شبیہ کے درمیان جدوجہد کرتا نظر آتا ہے۔ کہانی میں ایک بڑا موڑ اس وقت آتا ہے جب سمر ایک ڈیٹنگ ایپ کے ذریعے ایک خاتون سے رابطہ قائم کرتا ہے، جس کا کردار سپنا پبّی نے ادا کیا ہے۔بعد میں وہ خاتون سمر پر عصمت دری، بلیک میلنگ اور بھتہ خوری کے الزامات عائد کرتی ہے۔ ایک جانب سمر خود کو بے قصور قرار دیتا ہے اور خاتون کو "تعاقب کرنے والی" (اسٹاکر) کہتا ہے، جبکہ دوسری جانب ٹریلر میں اسے ایک ایسے قانونی جال میں پھنستا ہوا دکھایا گیا ہے جو ایک انتہائی بدعنوان نظام کی عکاسی کرتا ہے۔ بوبی دیول اور سپنا پبّی کے علاوہ فلم میں ثانیہ ملہوترا، صبا آزاد، راج بی شیٹی، جتیندر جوشی، ردھی سین، اندراجیت سوکومارن اور ناگیش بھوسلے بھی اہم کردار ادا کر رہے ہیں۔فلم کا اسکرین پلے سدھیپ شرما اور ابھیشیک بنرجی نے تحریر کیا ہے، جو مشہور سیریز "پاتال لوک"، "کوہرا" اور فلم "اڑتا پنجاب" کے لیے معروف ہیں۔ انوراگ کشیپ کی ہدایت کاری میں بننے والی اس فلم کو نکھیل دویدی کی پروڈکشن کمپنی سیفرن میجک ورکس نے تیار کیا ہے، جبکہ اسے زی اسٹوڈیوز کی معاونت حاصل ہے۔ فلم "بندر" 5 جون 2026 کو دنیا بھر کے سینما گھروں میں ریلیز کی جائے گی۔