برسلزیورپی یونین نے اپنی مہاجرت پالیسی میں بڑے پیمانے پر تبدیلیوں کی سمت قدم بڑھایا ہے، جس کا مقصد ملک بدری کے عمل کو تیز کرنا اور بیرونِ ملک حراستی مراکز قائم کرنے کے لیے متنازع معاہدے کرنا ہے۔ دوسری جانب انسانی حقوق کی تنظیموں نے اس کا موازنہ سابق امریکی صدر ڈونلڈ ٹرمپ کی سخت امیگریشن پالیسیوں سے کیا ہے۔27 ممالک کے گروپ کی صدارت کرنے والے قبرص کے نائب وزیر برائے امیگریشن نکولس ایونائیڈس نے کہا کہ نئے ضابطے کے تحت ان افراد کو واپس بھیجنے کا عمل تیز ہوگا جن کے پاس یورپی یونین میں رہنے کا کوئی قانونی حق نہیں ہے۔ یہ معاہدہ پیر کی شام یورپی یونین کی تین اہم اداروں - یورپی کمیشن، یورپی کونسل اور یورپی پارلیمنٹ - کے درمیان ہونے والی "ٹرائلاگ" مذاکرات کے دوران طے پایا۔ناقدین نے اس ضابطے کا موازنہ ٹرمپ دور کی امیگریشن حکمتِ عملی سے کیا، جس کے تحت ہزاروں افراد کو ملک بدر کرنے کے لیے مختلف ممالک کے ساتھ خفیہ معاہدے کیے گئے تھے۔ برطانیہ نے بھی تارکین وطن کو روانڈا بھیجنے کا منصوبہ بنایا تھا، لیکن یہ منصوبہ قانونی پیچیدگیوں میں پھنس گیا اور بعد میں نئی حکومت نے اسے روک دیا۔یہ عارضی تجویز اب یورپی یونین کے ارکان اور پارلیمنٹ کے پاس منظوری کے لیے جائے گی، جہاں اس کے جلد منظور ہونے کا امکان ہے۔ یورپی یونین کے رکن ممالک جلد ہی یونین سے باہر ممالک کے ساتھ دو طرفہ معاہدے کر سکیں گے جن کے تحت ملک بدری کے مراکز قائم کیے جائیں گے۔کم از کم پانچ یورپی ممالک - جرمنی، آسٹریا، نیدرلینڈز، ڈنمارک اور یونان - پہلے ہی افریقی ممالک سمیت تیسرے ممالک کے ساتھ ایسے "ڈیپورٹیشن سینٹرز" کے قیام پر بات چیت کر رہے ہیں۔ یہ ماڈل اٹلی اور البانیا کے درمیان ہونے والے حراستی مرکز معاہدے پر مبنی ہے۔2024 میں بعض ممالک میں دائیں بازو کی جماعتوں کے اقتدار میں آنے کے بعد یورپی یونین اپنی مہاجرت پالیسیوں کو مزید سخت بنا رہی ہے۔