مغربی بنگال میں 4 مئی کو ہونے والی ووٹوں کی گنتی سے عین قبل سیاسی ماحول اپنے عروج پر پہنچ گیا ہے۔ جمعرات کو ایگزٹ پول کے نتائج سامنے آنے کے بعد ریاست میں برسرِ اقتدار ترنمول کانگریس (ٹی ایم سی) اور بھارتیہ جنتا پارٹی (بی جے پی) کے درمیان سخت بیان بازی اور زمینی کشیدگی شروع ہو گئی ہے۔ تنازع کا مرکز 'ای وی ایم اور اسٹرونگ روم کی سکیورٹی' بن گیا ہے۔ ٹی ایم سی نے الزام لگایا ہے کہ کولکاتا کے اسٹرونگ رومز میں رکھے بیلٹ باکسز اور الیکٹرانک ووٹنگ مشینوں (ای وی ایم) کے ساتھ چھیڑ چھاڑ کی جا رہی ہے، جس نے نتائج سے پہلے ہی بنگال کا درجہ حرارت سیاسی طور پر انتہائی بڑھا دیا ہے۔

سی سی ٹی وی فوٹیج پر ہنگامہ، ٹی ایم سی لیڈروں کا دھرنا

یہ تنازع اس وقت شروع ہوا جب ٹی ایم سی نے کولکاتا کے کھودی رام انوشیلن کیندر اور نیتاجی انڈور اسٹیڈیم میں قائم ای وی ایم اسٹرونگ رومز کی مبینہ سی سی ٹی وی فوٹیج جاری کی۔ پارٹی کے سینئر لیڈروں ششی پانجا اور کنال گھوش نے الزام لگایا کہ اسٹرونگ روم کھولے جا رہے ہیں اور باہر کے لوگ اندر داخل ہو رہے ہیں۔ انہوں نے سوال اٹھایا کہ جب اسٹرونگ روم کھولا گیا تو ہمیں اطلاع کیوں نہیں دی گئی؟

ان الزامات کے بعد ششی پانجا اور کنال گھوش اپنے حامیوں کے ساتھ اسٹرونگ روم کے باہر دھرنے پر بیٹھ گئے اور مکمل سکیورٹی کو یقینی بنانے کا مطالبہ کیا۔

رات میں اسٹرونگ روم پہنچیں ممتا بنرجی

تنازع بڑھنے پر جمعرات کی دیر رات مغربی بنگال کی وزیر اعلیٰ ممتا بنرجی خود میدان میں آئیں۔ وہ سیدھا سخاوت میموریل اسکول پہنچیں، جہاں بھوانی پور اسمبلی سیٹ کی ای وی ایم مشینیں رکھی گئی ہیں۔ باہر آ کر میڈیا سے گفتگو کرتے ہوئے انہوں نے سنگین الزامات عائد کیے۔ممتا بنرجی نے کہا کہ ابتدا میں مرکزی سکیورٹی فورسز نے انہیں اندر جانے کی اجازت نہیں دی، جبکہ انتخابی قواعد کے مطابق امیدوار یا اس کا ایجنٹ سیلڈ روم کے دروازے تک جا سکتا ہے۔ بعد میں اجازت ملنے پر وہ اندر جا سکیں۔

انہوں نے سخت انتباہ دیتے ہوئے کہا کہ اتنے یکطرفہ انتخابات کے بعد بھی اگر ای وی ایم یا کاؤنٹنگ میں کسی قسم کی لوٹ کی کوشش کی گئی تو وہ اپنی جان لگا کر مقابلہ کریں گی اور ایسا ہونے نہیں دیں گی۔