بٹ کوائن نے ہفتے کے روز اپنی تیزی کو مزید آگے بڑھاتے ہوئے 80 ہزار ڈالر کی سطح کے قریب پہنچ گیا۔ اس کے ساتھ ہی کرپٹو کرنسی نے تین سال سے زائد عرصے میں اپنی سب سے بڑی ہفتہ وار بڑھوتری بھی درج کی ہے۔ دنیا کی سب سے بڑی ڈیجیٹل کرنسی کی قیمت گزشتہ 24 گھنٹوں کے دوران 4.8 فیصد تک بڑھ گئی اور صبح 9:10 بجے کے قریب یہ تقریباً 78,588 ڈالر پر ٹریڈ کر رہی تھی۔ اس سے ایک گھنٹے کے دوران بھی بٹ کوائن میں مزید 0.6 فیصد کا اضافہ ہوا، جبکہ گزشتہ سات دنوں میں اس کی قیمت مجموعی طور پر 24.5 فیصد بڑھ چکی ہے۔
مارچ 2023 کے بعد سب سے بڑی ہفتہ وار تیزی
بٹ کوائن کی حالیہ ہفتہ وار تیزی مارچ 2023 کے بعد اس کی سب سے بڑی ہفتہ وار بڑھوتری ہے۔ اس سے قبل مئی 2026 میں بھی بٹ کوائن تقریباً 80 ہزار ڈالر کی سطح پر ٹریڈ کرتا دیکھا گیا تھا۔ تجزیہ کاروں کے مطابق بٹ کوائن میں اس تیز اضافے کی ایک اہم وجہ امریکی محکمہ خزانہ کی جانب سے طویل مدتی بانڈز کی بائ بیک میں اضافے کا اعلان ہے۔ اس فیصلے کے بعد طویل مدتی بانڈ ییلڈ میں کمی آئی، جس سے سرمایہ کاروں میں نسبتاً زیادہ خطرے والے اثاثوں میں سرمایہ کاری کا رجحان مضبوط ہوا۔ بٹ کوائن سمیت دیگر رسکی اثاثوں کو اس صورتحال سے فائدہ ملا۔
شارٹ پوزیشنز کی بڑے پیمانے پر لیکویڈیشن
بٹ کوائن کی قیمت میں تیزی سے اضافے کے نتیجے میں اربوں ڈالر مالیت کی شارٹ پوزیشنز بھی بند ہوئیں۔ ان پوزیشنز کی لیکویڈیشن نے بٹ کوائن کی قیمت میں مزید تیزی پیدا کرنے میں اہم کردار ادا کیا۔ ادھر سونے کی قیمت بھی مئی کے بعد اپنی بلند ترین سطح پر پہنچ گئی۔ سرمایہ کاروں کو خدشہ ہے کہ بانڈ مارکیٹ میں مداخلت امریکی ڈالر پر دباؤ ڈال سکتی ہے، جس کے باعث سونے سمیت متبادل اثاثوں میں دلچسپی بڑھی ہے۔
ای ٹی ایف میں سرمایہ کاری سے سرمایہ کاروں کا اعتماد مضبوط
کرپٹو مارکیٹ میں سرمایہ کاروں کے اعتماد کو امریکہ میں کرپٹو انڈسٹری کے لیے نسبتاً سازگار ماحول کی توقعات سے بھی تقویت ملی ہے۔ امریکی صدر ڈونلڈ ٹرمپ کی Coinbase Global اور Payward سمیت کرپٹو کمپنیوں کے اعلیٰ عہدیداروں کے ساتھ ملاقات نے بھی کرپٹو سیکٹر کے حوالے سے مارکیٹ کے اعتماد کو مضبوط کیا۔ اس کے علاوہ ادارہ جاتی سرمایہ کاری میں بھی اضافہ ہوا ہے۔ امریکہ میں لسٹڈ اسپاٹ بٹ کوائن ایکسچینج ٹریڈڈ فنڈز (ETF) رواں ہفتے جنوری کے بعد اپنی سب سے زیادہ ہفتہ وار آمدنی ریکارڈ کرنے کی جانب بڑھ رہے ہیں۔ مجموعی طور پر 13 ETFs میں ایک ارب ڈالر سے زیادہ کی سرمایہ کاری ہوئی ہے۔
واصح رہے کہ حالیہ تیزی کے باوجود بٹ کوائن اب بھی اپنی ریکارڈ بلند ترین سطح سے خاصا نیچے ہے۔ اکتوبر 2025 میں بٹ کوائن تقریباً 1 لاکھ 26 ہزار ڈالر کی بلند ترین سطح تک پہنچا تھا۔ اس کے بعد کرپٹو کرنسی کو شدید گراوٹ کا سامنا کرنا پڑا اور جون 2026 کے آخر میں اس کی قیمت گر کر 58,642 ڈالر تک پہنچ گئی تھی۔ تاہم حالیہ تیزی نے بٹ کوائن کو ایک بار پھر 80 ہزار ڈالر کی اہم نفسیاتی سطح کے قریب پہنچا دیا ہے۔
بھارت ایکسپریس اردو۔