نئی دہلی: سنٹرل بورڈ آف سیکنڈری ایجوکیشن (سی بی ایس ای) نے 12ویں جماعت کے ان لاکھوں طلبہ کو بڑی راحت فراہم کی ہے، جو اپنے بورڈ امتحانات کے نتائج سے مطمئن نہیں تھے اور نمبروں کی تصدیق (ویریفکیشن) اور دوبارہ جانچ (ری ایویلیوایشن) کے عمل کے آغاز کا انتظار کر رہے تھے۔ بورڈ نے باضابطہ طور پر ویریفکیشن اور ری ایویلیوایشن کے لیے آن لائن پورٹل فعال کر دیا ہے۔سی بی ایس ای نے سوشل میڈیا پلیٹ فارم ایکس پر ایک پوسٹ کے ذریعے طلبہ کو اطلاع دی کہ نمبروں کی تصدیق اور دوبارہ جانچ کے لیے درخواستوں کا عمل شروع ہو چکا ہے۔ بورڈ نے درخواست کے طریقہ کار کو آسان بنانے کے لیے ایک وضاحتی ویڈیو بھی جاری کی ہے، جس میں مرحلہ وار ہدایات فراہم کی گئی ہیں۔ طلبہ کو مشورہ دیا گیا ہے کہ درخواست جمع کرانے سے قبل ویڈیو کا بغور مشاہدہ کریں۔

واضح رہے کہ سی بی ایس ای نے ابتدائی طور پر یہ پورٹل 29 مئی کو کھولنے کا اعلان کیا تھا، قابل ذکر بات یہ ہےکہ بعد میں اس کی تاریخ بڑھا کر یکم جون کر دی گئی تھی۔ بورڈ کے مطابق طلبہ کو ایک شفاف اور تکنیکی مسائل سے پاک نظام فراہم کرنے کے لیے اضافی وقت درکار تھا۔قابل ذکر بات یہ ہے کہ یکم جون کو پورٹل فعال ہونے کے بعد متعدد طلبہ کو لاگ اِن کرنے اور خدمات تک رسائی میں دشواری کا سامنا کرنا پڑا۔ تکنیکی خرابیوں کے باعث پورٹل مکمل طور پر کام نہیں کر سکا، جس کے بعد طلبہ اور والدین میں تشویش پیدا ہو گئی۔ اب 2 جون کو بورڈ نے پورٹل کو دوبارہ فعال کرتے ہوئے دعویٰ کیا ہے کہ بیشتر مسائل دور کر دیے گئے ہیں۔

سی بی ایس ای نے اتوار کو جاری ایک بیان میں کہا تھا کہ امتحانی خدمات کے لیے استعمال ہونے والے "آن مارک" پورٹل میں سامنے آنے والی خامیوں پر مسلسل نظر رکھی جا رہی ہے اور انہیں دور کرنے کے لیے اقدامات کیے جا رہے ہیں۔ بورڈ کے مطابق مختلف سرکاری ادارے اور انڈین انسٹی ٹیوٹس آف ٹیکنالوجی (آئی آئی ٹی) کے سائبر سکیورٹی ماہرین بھی نظام کو مزید محفوظ اور مستحکم بنانے میں تعاون کر رہے ہیں۔یہ پیش رفت 12ویں جماعت کی جوابی کاپیوں کی جانچ کے لیے حال ہی میں متعارف کرائے گئے "آن اسکرین مارکنگ" (او ایس ایم) نظام کے حوالے سے اٹھنے والے سوالات کے درمیان سامنے آئی ہے۔ تکنیکی خرابیوں اور جانچ کے عمل سے متعلق بعض خدشات کے بعد اس نظام پر تنقید بھی کی گئی تھی۔