مرکزی وزیر داخلہ امت شاہ نے کہا ہے کہ وزیر اعظم نریندر مودی کی قیادت میں ملک سے نکسل ازم کا خاتمہ ہو چکا ہے۔ انہوں نے دعویٰ کیا کہ گزشتہ پانچ دہائیوں سے ملک کے لیے بڑا چیلنج بنے نکسل ازم کا 31 مارچ 2026 کو مکمل خاتمہ کر دیا گیا۔ احمد آباد کے ماتا امیا دھام میں نئے ہاسٹل عمارتوں کے افتتاحی پروگرام سے خطاب کرتے ہوئے امت شاہ نے کہا کہ گزشتہ 10 برسوں میں بی جے پی حکومت نے ملک کی داخلی سلامتی کے نظام میں تاریخی تبدیلیاں کی ہیں۔

انہوں نے کہا کہ مودی حکومت نے نہ صرف اقتصادی شعبے میں بلکہ قومی سلامتی کے میدان میں بھی ''انقلابی تبدیلی'' لائی ہے۔ امت شاہ نے کہا، ''ملک میں اقتصادی ترقی ضرور ہوئی ہے، لیکن قومی سلامتی کے شعبے میں بھی غیر معمولی تبدیلی دیکھنے کو ملی ہے۔'' انہوں نے مزید کہا کہ اگر داخلی سلامتی کی بات کی جائے تو دہشت گردی اور نکسل ازم جیسے بڑے مسائل پر بھی مودی حکومت نے فیصلہ کن کارروائی کی ہے۔

دہشت گردی اور نکسل ازم کے خلاف سخت کارروائی

وزیر داخلہ نے کہا، ''وزیر اعظم نریندر مودی کی قیادت میں صرف 10 برسوں کے اندر دہشت گردی اور نکسل ازم کو ختم کر دیا گیا ہے۔'' انہوں نے دعویٰ کیا کہ حکومت کی سخت پالیسیوں اور مؤثر حکمت عملی کے باعث ملک کی داخلی سلامتی کی صورتحال پہلے سے کہیں زیادہ مضبوط ہوئی ہے۔

دراندازی اور 'ڈیموگرافک چینج کمیشن' کا قیام

امت شاہ نے اپنی تقریر میں مغربی بنگال اور دراندازی کے مسئلے کا بھی ذکر کیا۔ انہوں نے بتایا کہ وزارت داخلہ نے ''ڈیموگرافک چینج کمیشن'' تشکیل دیا ہے۔ وزیر داخلہ کے مطابق، یہ کمیشن غیر معمولی آبادیاتی تبدیلیوں، ان کے اسباب اور دراندازی سے متعلق آبادی میں ہونے والی تبدیلیوں کے قانونی پہلوؤں کا تفصیلی مطالعہ کرے گا۔

170 کروڑ روپے کی لاگت سے تعمیر شدہ ہاسٹل کا افتتاح

یہ پروگرام ماتا امیا دھام میں جے ایس پٹیل ہاسٹل اور تپسوی کمار اروند بھائی پٹیل گرلز ہاسٹل کے افتتاح کے موقع پر منعقد کیا گیا تھا۔ منتظمین کے مطابق، دونوں 13 منزلہ ہاسٹل عمارتیں 170 کروڑ روپے سے زائد کی لاگت سے تعمیر کی گئی ہیں۔ ان ہاسٹلز میں احمد آباد اور گاندھی نگر میں تعلیم حاصل کرنے والے تقریباً 1600 طلبہ و طالبات کے رہائش کی سہولت فراہم کی جائے گی۔