2003 میں آغاز، 2023 سے ای-20 پٹرول کا نفاذ

وزارت کے مطابق ایتھنول بلینڈنگ پروگرام کا آغاز 2003 میں خام تیل کی درآمدات کم کرنے، توانائی کے تحفظ کو مضبوط بنانے اور ماحولیات کے تحفظ کو فروغ دینے کے مقصد سے کیا گیا تھا۔ یہ پروگرام مرحلہ وار تکنیکی تیاری اور متعلقہ فریقوں سے مشاورت کے بعد نافذ کیا گیا، جس کے تحت 2023 سے 20 فیصد ایتھنول ملا پٹرول (E20) ملک بھر میں متعارف کرایا گیا۔ وزارت نے کہا کہ آئل مارکیٹنگ کمپنیوں، آٹوموبائل صنعت، فیول ٹیسٹنگ ایجنسیوں اور دیگر متعلقہ اداروں کے ساتھ مل کر اس پروگرام پر مسلسل نظر رکھی جا رہی ہے اور ای-20 پٹرول متعارف ہونے کے بعد انجن خراب ہونے یا گاڑیوں میں وسیع پیمانے پر کسی خرابی کی کوئی مصدقہ اطلاع سامنے نہیں آئی۔

چیونٹیوں اور گنے کے رس سے متعلق ویڈیوز بے بنیاد

وزارت نے کہا کہ بعض ویڈیوز میں یہ جھوٹا تاثر دیا جا رہا ہے کہ پٹرول میں براہِ راست گنے کا رس ملایا جاتا ہے، جبکہ حقیقت یہ ہے کہ ایندھن میں استعمال ہونے والا ایتھنول صنعتی عمل، خمیر سازی (Fermentation) اور کشید (Distillation) کے بعد تیار کیا جاتا ہے اور معیار کی سخت جانچ کے بعد ہی پٹرول میں ملایا جاتا ہے۔ وزارت نے مزید کہا کہ حال ہی میں ایک ویڈیو میں گاڑی کے فیول ٹینک کے قریب چیونٹیوں کی موجودگی کو ای-20 پٹرول سے جوڑا گیا تھا، تاہم بھارت پیٹرولیم کارپوریشن لمیٹڈ (BPCL) نے واضح کیا ہے کہ فیول گریڈ ایتھنول میں شکر باقی نہیں رہتی اور اس میں ایسے اجزا شامل ہوتے ہیں جو کیڑوں کو دور رکھتے ہیں، اس لیے چیونٹیوں کی موجودگی کو ای-20 پٹرول سے جوڑنے کا کوئی سائنسی ثبوت موجود نہیں ہے۔

انشورنس سے متعلق افواہیں بھی غلط قرار

وزارت نے کہا کہ سوشل میڈیا پر یہ دعوے بھی کیے جا رہے تھے کہ ای-20 پٹرول استعمال کرنے سے گاڑی کی انشورنس متاثر ہو سکتی ہے، تاہم متعلقہ اداروں نے ان دعوؤں کی بھی تردید کرتے ہوئے انہیں مکمل طور پر غلط قرار دیا ہے۔ وزارت کے مطابق ایتھنول ملا پٹرول عالمی سطح پر تسلیم شدہ ایندھن ہے اور امریکہ، برازیل اور جاپان سمیت کئی ممالک میں کامیابی سے استعمال کیا جا رہا ہے، جبکہ برازیل میں E27 طویل عرصے سے معیاری پٹرول کے طور پر رائج ہے۔

زرِ مبادلہ کی بچت اور کسانوں کو فائدہ

وزارتِ پیٹرولیم نے کہا کہ ایتھنول بلینڈنگ پروگرام کے نتیجے میں خام تیل کی درآمدات میں کمی آئی ہے، جس سے ملک کو 1.4 لاکھ کروڑ روپے سے زائد کے زرِ مبادلہ کی بچت ہوئی ہے۔ اس پروگرام سے ایتھنول کی تیاری میں استعمال ہونے والی زرعی اجناس کی مانگ میں بھی مسلسل اضافہ ہوا ہے، جس سے کسانوں کی آمدنی میں بہتری اور دیہی معیشت کو مضبوطی ملی ہے۔ وزارت نے کہا کہ ایتھنول بلینڈنگ بھارت کی توانائی کے تحفظ کو مستحکم بنانے، کاربن کے اخراج میں کمی لانے اور صاف و شفاف توانائی کی جانب ملک کے سفر کو آگے بڑھانے میں اہم کردار ادا کر رہی ہے، اور حکومت اس پروگرام کو سائنسی شواہد، شفافیت اور صارفین کے مفادات کو مدنظر رکھتے ہوئے آگے بڑھانے کے لیے پُرعزم ہے۔

بھارت ایکسپریس اردو۔