نئی دہلی: نریندر مودی نے گجرات کے 66ویں یومِ تاسیس کے موقع پر وزیر اعلیٰ بھوپیندر پٹیل کو ایک خصوصی خط لکھ کر ریاست کی ترقی اور سیاسی استحکام کی بھرپور تعریف کی۔ انہوں نے کہا کہ گجرات نے ملک کے سامنے ایک منفرد مثال پیش کی ہے کہ کس طرح عوامی خدمت اور بہتر کارکردگی کے ذریعے حکومت مخالف رجحان (اینٹی انکمبنسی) کو حکومت کے حق میں حمایت (پرو انکمبنسی) میں تبدیل کیا جا سکتا ہے۔وزیر اعظم مودی نے اپنے خط میں کہا کہ عام طور پر سیاست میں یہ سمجھا جاتا ہے کہ وقت گزرنے کے ساتھ حکومتوں کے خلاف عوامی ناراضگی بڑھتی ہے، مگر گجرات نے 1995 سے اس تصور کو غلط ثابت کیا ہے۔ انہوں نے کہا کہ جب حکومتیں عوامی توقعات پر پورا اترتی ہیں تو انہیں مسلسل عوامی حمایت حاصل ہوتی ہے۔ حالیہ بلدیاتی انتخابات کے نتائج کو انہوں نے بھوپیندر پٹیل حکومت کی عوام دوست پالیسیوں پر اعتماد کی مہر قرار دیا۔

نریندر مودی نے 1990 کی دہائی کے آخر کا ذکر کرتے ہوئے کہا کہ اس وقت گجرات سیاسی عدم استحکام اور سماجی تناؤ کا شکار تھا اور بہت سے لوگوں کو خدشہ تھا کہ ریاست دوبارہ سنبھل نہیں پائے گی۔ تاہم گجرات کے عوام نے اپنی محنت اور حوصلے سے تمام خدشات کو غلط ثابت کر دیا اور آج یہ ریاست ملک کی معاشی ترقی کا ایک اہم انجن بن چکی ہے۔انہوں نے ترقی کے مختلف شعبوں کا ذکر کرتے ہوئے کہا کہ گجرات آج مینوفیکچرنگ، قابل تجدید توانائی اور شمسی توانائی کے میدان میں عالمی سطح پر اپنی پہچان بنا چکا ہے۔ نرمدہ کے پانی کو کَچھ اور سوراشٹر تک پہنچانے کے منصوبے کو بھی انہوں نے ایک بڑی کامیابی قرار دیا۔ انہوں نے کہا کہ سردار سروور ڈیم کی تکمیل اور اس کے فوائد کا کسانوں تک پہنچنا ریاست کے لیے ایک اہم سنگ میل ثابت ہوا۔

وزیر اعظم نریندر مودی نے مرکزی اور ریاستی حکومتوں کی مشترکہ کوششوں کو سراہتے ہوئے وندے بھارت ٹرین، بلٹ ٹرین منصوبہ، احمد آباد میٹرو اور راجکوٹ ایئرپورٹ جیسے پروجیکٹس کو ترقی کی نئی سمت قرار دیا۔ انہوں نے وڈودرا میں ہوائی جہاز سازی اور داہود میں ریل کوچ فیکٹری کا ذکر کرتے ہوئے کہا کہ 'میک اِن انڈیا' مہم میں گجرات کا کردار نمایاں ہے۔مزید برآں، انہوں نے سورت کی ہیرے کی صنعت اور جام نگر میں قائم عالمی مرکز برائے روایتی طب کی عالمی سطح پر شناخت کو بھی سراہا۔ اپنی ثقافتی وابستگی کا اظہار کرتے ہوئے انہوں نے سومناتھ مندر کا حوالہ دیا اور اسے اٹوٹ عقیدت کی علامت قرار دیا جو بار بار تباہ ہونے کے باوجود دوبارہ عظمت کے ساتھ کھڑا ہوا۔آخر میں وزیر اعظم مودی نے اعلان کیا کہ وہ سومناتھ مندر کی از سر نو پران پرتشتھا کے 75 سال مکمل ہونے کے موقع پر جلد گجرات کا دورہ کریں گے اور اس تاریخی تقریب میں شرکت کریں گے۔