نئی دہلی: بھارت کے بینکاری شعبے سے ایک اہم اور حوصلہ افزا خبر سامنے آئی ہے، جہاں مالی سال 2025-26 کے دوران شیڈولڈ کمرشل بینکوں نے قرضوں کی تقسیم میں نمایاں اضافہ درج کیا ہے۔ مرکزی حکومت نے اس پیش رفت کو ملک کی مضبوط ہوتی معیشت اور بڑھتی کاروباری سرگرمیوں کی علامت قرار دیا ہے۔ وزارتِ خزانہ کے مطابق اس عرصے میں مجموعی کریڈٹ گروتھ 15.9 فیصد رہی، جو گزشتہ مالی سال کے مقابلے میں نمایاں طور پر زیادہ ہے۔ حکومتی اعداد و شمار کے مطابق مارچ 2026 تک ملک میں بینکوں کا مجموعی بقایا قرض 212.9 لاکھ کروڑ روپے تک پہنچ گیا، جو ایک سال قبل کے مقابلے میں تقریباً 29 لاکھ کروڑ روپے زیادہ ہے۔ ماہرین کے مطابق یہ اضافہ نہ صرف صنعتی و تجارتی سرگرمیوں میں بہتری کی نشاندہی کرتا ہے بلکہ عوام اور کاروباری طبقے کی بڑھتی مالی ضروریات کو بھی ظاہر کرتا ہے۔

رپورٹ میں بتایا گیا ہے کہ نان فوڈ کریڈٹ یعنی غیر غذائی شعبوں میں بھی اسی رفتار سے 15.9 فیصد اضافہ ہوا، جو پچھلے سال کے مقابلے میں تقریباً پانچ فیصد زیادہ ہے۔ اس سے ظاہر ہوتا ہے کہ مختلف شعبوں میں سرمایہ کاری اور مالی سرگرمیوں میں وسعت آئی ہے، جس نے مجموعی اقتصادی ترقی کو سہارا دیا ہے۔ شعبہ وار جائزہ لیا جائے تو اس بار سب سے زیادہ قرض سروس سیکٹر کو دیا گیا، جس کے بعد ذاتی قرض، زراعت اور صنعتی شعبہ نمایاں رہے۔ سروس سیکٹر میں 19 فیصد کی مضبوط ترقی ریکارڈ کی گئی، جس میں این بی ایف سی، تجارتی سرگرمیوں اور کمرشل رئیل اسٹیٹ کا اہم کردار رہا۔

زرعی شعبہ بھی اس دوڑ میں پیچھے نہیں رہا اور یہاں قرضوں میں 15.7 فیصد اضافہ دیکھنے میں آیا۔ ماہرین کا کہنا ہے کہ دیہی علاقوں میں مالی شمولیت میں اضافہ اور زرعی سرگرمیوں میں بہتری نے اس ترقی کو ممکن بنایا۔ اس کے ساتھ ساتھ صنعتی شعبے میں بھی نمایاں بہتری دیکھی گئی، جہاں مجموعی طور پر 15 فیصد قرض اضافہ ریکارڈ کیا گیا، جو گزشتہ سال کے مقابلے میں تقریباً دوگنا ہے۔ خاص طور پر مائیکرو اور اسمال انڈسٹریز میں زبردست اضافہ دیکھنے کو ملا، جہاں قرضوں کی شرح 33.1 فیصد تک پہنچ گئی۔ اسی طرح درمیانے درجے کی صنعتوں میں بھی 21.7 فیصد اضافہ ریکارڈ کیا گیا۔ بنیادی ڈھانچے، دھات، کیمیکل اور توانائی جیسے شعبوں نے اس ترقی میں کلیدی کردار ادا کیا۔