آئی پی ایل 2026 کے 70 لیگ مقابلے مکمل ہونے کے بعد اب ٹورنامنٹ اپنے آخری مرحلے میں داخل ہو چکا ہے۔ منگل سے پلے آف مرحلے کا آغاز ہوگا، جہاں رائل چیلنجرز بنگلورو (آر سی بی)، گجرات ٹائٹنس (جی ٹی)، سن رائزرس حیدرآباد (ایس آر ایچ) اور راجستھان رائلز (آر آر) ٹائٹل کی جنگ لڑتی نظر آئیں گی۔ چاروں ٹیموں نے اس سیزن شاندار کارکردگی کا مظاہرہ کیا، لیکن سوال یہ ہے کہ ان میں سب سے مضبوط دعویدار کون سی ٹیم دکھائی دے رہی ہے۔

آر سی بی کے پاس خطاب بچانے کا سنہری موقع

دفاعی چیمپئن آر سی بی اس بار بھی زبردست فارم میں دکھائی دے رہی ہے۔ رجت پاٹیدار کی قیادت میں ٹیم نے پورے سیزن میں متوازن کھیل پیش کیا۔ بلے بازی میں وراٹ کوہلی، دیودت پڈیکل، رجت پاٹیدار، کرونال پانڈیا اور ٹم ڈیوڈ نے اہم کردار ادا کیا ہے۔ وینکٹیش ایئر نے بھی کئی مواقع پر ٹیم کو سنبھالا دیا۔گیند بازی میں بھونیشور کمار مسلسل خطرناک ثابت ہوئے ہیں، جبکہ جوش ہیزل ووڈ اور رسکھ سلام نے ان کا بھرپور ساتھ دیا۔ تاہم آر سی بی کی سب سے بڑی کمزوری یہ رہی کہ ٹاپ آرڈر ناکام ہونے پر مڈل آرڈر بڑے اسکور تک ٹیم کو نہیں لے جا سکا۔

دوسری ٹرافی پر گجرات ٹائٹنس کی نظر

شبھمن گل کی قیادت میں گجرات ٹائٹنس نے اس سیزن انتہائی متاثر کن کھیل دکھایا ہے۔ گل اور سائی سدرشن کی اوپننگ جوڑی نے مسلسل رنز بنائے، جبکہ جوس بٹلر نے نمبر تین پر شاندار کارکردگی پیش کی۔ بولنگ میں محمد سراج، کگیسو ربادا اور پرسدھ کرشنا نے اہم مواقع پر وکٹیں حاصل کیں۔ راشد خان کی فارم میں واپسی ٹیم کے لیے بڑی خوشخبری ہے۔ البتہ گجرات کا مڈل آرڈر دباؤ میں اکثر بکھرتا دکھائی دیا ہے۔

سن رائزرس حیدرآباد کی زبردست واپسی

سن رائزرس حیدرآباد نے خراب شروعات کے باوجود شاندار کم بیک کیا۔ ابھیشیک شرما اور ٹریوس ہیڈ کی اوپننگ جوڑی بہترین ردھم میں ہے، جبکہ ایشان کشن اور ہینرک کلاسن مسلسل رنز بنا رہے ہیں۔ نتیش کمار ریڈی نے آل راؤنڈر کے طور پر اہم کردار ادا کیا۔ بولنگ میں ایشان ملنگا اور ثاقب حسین نے متاثر کیا، لیکن معیاری اسپنر کی کمی ٹیم کے لیے بڑا مسئلہ بن سکتی ہے۔