خلیجی ممالک نے پیر کی صبح کویت میں امریکی فوجی اڈے کو نشانہ بنانے والے ایرانی حملے کی سخت مذمت کرتے ہوئے اسے خطے کے امن و استحکام کے لیے سنگین خطرہ قرار دیا ہے۔ خلیج تعاون کونسل (جی سی سی) کے سیکریٹری جنرل جاسم محمد البدیوی نے ایران کی جانب سے کیے گئے حملے پر شدید ردعمل ظاہر کرتے ہوئے کہا کہ یہ اقدام نہ صرف خطرناک بلکہ انتہائی غیر ذمہ دارانہ بھی ہے، جو خطے میں جاری کشیدگی کو مزید بڑھا سکتا ہے۔ جاسم محمد البدیوی نے اپنے بیان میں کہا کہ حالیہ حملوں نے خلیجی خطے میں سلامتی اور استحکام کو برقرار رکھنے کی بین الاقوامی کوششوں کو نقصان پہنچایا ہے۔ انہوں نے اقوام متحدہ کی سلامتی کونسل اور عالمی برادری سے مطالبہ کیا کہ وہ اس قسم کی کارروائیوں کے خلاف مضبوط اور مؤثر موقف اختیار کریں تاکہ مستقبل میں ایسے واقعات کی روک تھام ممکن ہو سکے۔ ان کے مطابق ایران کا حملہ علاقائی اور عالمی امن و سلامتی کے لیے براہ راست خطرہ ہے اور اس کے اثرات پورے مشرق وسطیٰ میں محسوس کیے جا سکتے ہیں۔
انہوں نے واضح کیا کہ کویت جی سی سی کا ایک اہم رکن ملک ہے اور کونسل کے تمام رکن ممالک اس کی سلامتی، خودمختاری اور علاقائی سالمیت کے تحفظ کے لیے مکمل طور پر متحد ہیں۔ البدیوی نے کہا کہ جی سی سی ممالک کویت کی حکومت کی جانب سے شہریوں اور مقیم غیر ملکیوں کے تحفظ کے لیے اٹھائے جانے والے تمام اقدامات کی بھرپور حمایت کرتے ہیں اور کسی بھی خطرے کے مقابلے میں اس کے ساتھ کھڑے رہیں گے۔ ایرانی پاسداران انقلاب (آئی آر جی سی) کی جانب سے پیر کی صبح کویت میں موجود امریکی فوجی اڈے کو نشانہ بنائے جانے کے بعد خطے میں تشویش کی لہر دوڑ گئی۔ اس واقعے کے فوراً بعد سعودی عرب نے بھی سخت ردعمل ظاہر کرتے ہوئے ایران کے بار بار اور اشتعال انگیز حملوں کی شدید مذمت کی۔
سعودی وزارت خارجہ نے اپنے بیان میں کہا کہ کویت پر حملہ اس کی خودمختاری کی کھلی خلاف ورزی ہے اور یہ بین الاقوامی قوانین اور اقوام متحدہ کے چارٹر کے منافی عمل ہے۔ وزارت کے مطابق ایسے اقدامات خطے میں امن اور استحکام کی بحالی کے لیے جاری سفارتی اور سیاسی کوششوں کو کمزور کرتے ہیں۔ بیان میں مزید کہا گیا کہ سعودی عرب کویت، اس کی حکومت اور عوام کے ساتھ مکمل یکجہتی کا اظہار کرتا ہے اور اس کی سلامتی کے تحفظ کے لیے کیے جانے والے ہر اقدام کی حمایت جاری رکھے گا۔ دوسری جانب امریکی فوج کے سینٹرل کمانڈ (سینٹ کام) نے ایک بیان میں کہا ہے کہ امریکی افواج نے کویت میں تعینات اہلکاروں کو نشانہ بنانے والی دو ایرانی بیلسٹک میزائلوں کو کامیابی سے فضا میں تباہ کر دیا۔ سینٹ کام کے مطابق حملہ امریکی وقت کے مطابق رات گیارہ بجے کیا گیا، تاہم دفاعی نظام نے فوری کارروائی کرتے ہوئے خطرے کو ناکام بنا دیا۔ بیان میں کہا گیا کہ اس حملے میں کسی امریکی فوجی کو نقصان نہیں پہنچا۔
ادھر ایران نے اپنے مؤقف کا دفاع کرتے ہوئے کہا ہے کہ اسے ان علاقائی فوجی اڈوں اور تنصیبات کو نشانہ بنانے کا حق حاصل ہے جو اس کے خلاف کارروائیوں کے لیے استعمال کی جاتی ہیں۔ ایرانی وزارت خارجہ کے ترجمان اسماعیل بقائی نے کہا کہ تہران اپنے دفاع کے حق سے دستبردار نہیں ہوگا۔ ان کا یہ بیان ایسے وقت میں سامنے آیا جب امریکہ نے ایرانی جزائر گورک اور قشم پر حملے کرنے کا دعویٰ کیا تھا، جس کے بعد دونوں ممالک کے درمیان کشیدگی میں مزید اضافہ دیکھنے میں آیا ہے۔
بھارت ایکسپریس اردو۔