اس پیش رفت پر ردعمل ظاہر کرتے ہوئے یوسف نے سوشل میڈیا پر لکھا، ''موجودہ دورے سے کھلاڑیوں اور کوچنگ اسٹاف کو واپس بلانے کا حکام کا حالیہ فیصلہ صرف کارکردگی سے متعلق نہیں لگتا۔ ہم ظہیر عباس، جاوید میانداد، انضمام الحق یا سعید انور جیسے عظیم کھلاڑیوں کو متبادل کے طور پر نہیں بھیج رہے ہیں۔ اس کے بجائے یہ قدم اندرونی خلفشار، رائے کے اختلاف اور تنازعات کے اس معروف سلسلے کی عکاسی کرتا ہے، جس نے طویل عرصے سے پاکستان کرکٹ کو پریشان کر رکھا ہے۔''

مسلسل میدان سے باہر کی افراتفری نقصان دہ

پاکستان کے لیے 90 ٹیسٹ میچ کھیلنے اور 7,500 سے زیادہ رنز بنانے والے یوسف نے کہا کہ 1992 ورلڈ کپ میں پاکستان کی تاریخی فتح کے بعد سے عدم استحکام بار بار واپس آتا رہا ہے۔ سابق کپتان نے خبردار کیا کہ میدان سے باہر مسلسل جاری افراتفری ٹیم کی ترقی اور شائقین کے اعتماد کو مزید نقصان پہنچا سکتی ہے۔

یوسف نے کہا، ''سبق واضح ہے۔ صرف مضبوط کارکردگی اور مسلسل مثبت نتائج ہی ماحول کو بہتر بنا سکتے ہیں۔ اگر پاکستان کرکٹ کو اپنی صلاحیت واپس حاصل کرنی ہے اور شائقین میں اعتماد پیدا کرنا ہے تو اسے بورڈ روم کے بجائے میدان پر توجہ مرکوز کرنی چاہیے۔ کامیابی سب سے مؤثر دوا ہے۔''

لارڈز ٹیسٹ میں 194 رنز کی شکست کے بعد تبدیلیاں

محمد یوسف کا یہ ردعمل لارڈز ٹیسٹ میں انگلینڈ کے ہاتھوں پاکستان کو 194 رنز سے شکست ملنے کے بعد سامنے آیا ہے۔ لارڈز ٹیسٹ میں شکست کے بعد پی سی بی نے ٹیسٹ ٹیم میں بڑی تبدیلی کرتے ہوئے وکٹ کیپر بلے باز محمد رضوان، اوپنر امام الحق، سلمان علی آغا، علی عثمان، عامر جمال، محمد اویس جعفر اور خرم شہزاد کو ٹیم سے ریلیز کرکے پاکستان واپس بلا لیا ہے۔

ٹیسٹ کے ہیڈ کوچ سرفراز احمد اور بولنگ کوچ عمر گل کو بھی عہدوں سے ہٹا دیا گیا ہے۔ تیسرے ٹیسٹ میں پاکستان ٹیم کی کوچنگ مائیک ہیسن اور ایشلے نوفکے کریں گے۔ پاکستان نے ہیڈنگلے میں کھیلا گیا پہلا ٹیسٹ ایک اننگز اور 103 رنز سے گنوایا تھا۔ سیریز کا تیسرا اور آخری ٹیسٹ 9 ستمبر سے برمنگھم میں کھیلا جائے گا۔

بھارت ایکسپریس۔