مرکز اور ریاستوں کی مشترکہ شرکت

جل شکتی وزارت کی جانب سے منعقدہ 2 روزہ قومی محکمہ جاتی سربراہ اجلاس میں ریاستوں اور مرکز کے زیر انتظام علاقوں کے وزرا اور سینئر افسران نے شرکت کی۔ وزیر اعظم کے تصور کے تحت منعقد کیے جانے والے محکمہ جاتی سربراہ اجلاسوں کی یہ پہلی سیریز ہے، جس کا مقصد تعاون پر مبنی وفاقیت کو مضبوط بنانا اور قومی ترجیحات پر اجتماعی شرکت کو فروغ دینا ہے۔ وزیر اعظم نے کہا کہ یہ اجلاس محض ایک مرتبہ ہونے والا پروگرام نہیں ہونا چاہیے، بلکہ اس کی سفارشات پر مسلسل جائزے اور فالو اَپ کے لیے باقاعدہ نظام وضع کیا جانا چاہیے۔

شہری علاقوں میں پانی کے انتظام پر زور

وزیر اعظم نے تیزی سے بڑھتی شہری آبادی، آبادی میں اضافے اور مستقبل کی آبی ضروریات کے پیش نظر شہری مقامی اداروں کو پانی کے انتظام کے تئیں حساس بنانے پر زور دیا۔ ساتھ ہی انہوں نے شہری اداروں کے لیے بھی ایسے 'چنتن شِور' یعنی غور و فکر کے اجلاس منعقد کرنے کی تجویز دی۔

جدید ٹیکنالوجی اپنانے کی ضرورت

پی ایم مودی نے پانی کی بچت کرنے والی جدید ٹیکنالوجی کو بڑے پیمانے پر اپنانے کی ضرورت پر زور دیا۔ انہوں نے عالمی سطح پر رائج بہترین طریقوں سے واقف کرانے کے لیے نمائشیں اور ورکشاپس منعقد کرنے کی بھی تجویز دی، تاکہ بھارتی صنعت کار اور دیگر متعلقہ فریق مؤثر حل تیار کر سکیں۔

'جل اتسو' مہم چلانے کی تجویز

عوامی شراکت داری پر زور دیتے ہوئے وزیر اعظم نے 'جل اتسو' مہم چلانے کی تجویز پیش کی، جس سے لوگوں میں پانی کے تحفظ کے تئیں بیداری پیدا کی جا سکے۔ انہوں نے آبی ذخائر سے باقاعدگی سے گاد نکالنے (ڈی سلٹنگ) کو بھی اس مہم کا حصہ بنانے اور اس کے لیے واضح معیار اور ایس او پی تیار کرنے کی بات کہی۔

ڈیموں کی حفاظت کے لیے مکمل تیاری

ڈیموں کی حفاظت کے معاملے پر وزیر اعظم نے ہر مون سون سے قبل مکمل تیاری، حفاظتی معیارات پر عمل درآمد اور اسکولوں کے نصاب میں بھی پانی اور ڈیموں کی حفاظت سے متعلق موضوعات شامل کرنے پر زور دیا۔

اعلیٰ تعلیمی اداروں میں صلاحیت سازی

انہوں نے یونیورسٹیوں اور اعلیٰ تعلیمی اداروں میں پانی کے انتظام اور آبی حکمرانی سے متعلق علم اور صلاحیت سازی کو مضبوط کرنے کی ضرورت پر زور دیا۔ اس کے علاوہ ریاستوں کے عوامی نمائندوں، افسران اور کسانوں کے مطالعاتی دورے منعقد کرنے کی تجویز دی، تاکہ کامیاب ماڈلز کو دیگر ریاستوں میں بھی اپنایا جا سکے۔

آبی شعبے میں مضبوط ڈیٹا گورننس پر زور

وزیر اعظم نے آبی شعبے میں مضبوط ڈیٹا گورننس کی ضرورت بتاتے ہوئے کہا کہ پانی سے متعلق اعداد و شمار کو منظم انداز میں جمع، تجزیہ اور استعمال کیا جانا چاہیے۔ انہوں نے یکساں فارمیٹ میں ڈیٹا جمع کرنے اور اس کے تجزیے کے لیے مصنوعی ذہانت (اے آئی) کے استعمال پر بھی زور دیا۔

آبی بحران کو موقع میں بدلا جا سکتا ہے

گجرات کے وزیر اعلیٰ کی حیثیت سے اپنے دور کا ذکر کرتے ہوئے پی ایم مودی نے کہا کہ منصوبہ بند حکمت عملی، عزم اور قابل افسران کی مدد سے آبی بحران کو موقع میں تبدیل کیا جا سکتا ہے۔

سی آر پاٹل نے گنوائے 4 اہم نتائج

اختتامی اجلاس میں مرکزی وزیر جل شکتی سی آر پاٹل نے اجلاس کے 4 اہم نتائج کا ذکر کیا۔ ان میں آبی بنیادی ڈھانچے کے منصوبوں کو تیزی سے مکمل کرنا، پانی کے تحفظ کو عوامی تحریک بنانا، پینے کے پانی کے ذرائع کی طویل مدتی پائیداری یقینی بنانا اور دیہی پینے کے پانی کی اسکیموں کے مؤثر آپریشن و دیکھ بھال کو ادارہ جاتی شکل دینا شامل ہیں۔

بھارت ایکسپریس۔