وی موہنا نے تاریخ رقم کر دی

نئی تقرریوں میں سب سے زیادہ توجہ سینئر ایڈووکیٹ وی موہنا کی تقرری نے حاصل کی ہے۔ وہ بار سے براہِ راست سپریم کورٹ کی جج مقرر ہونے والی گیارہویں شخصیت بن گئی ہیں۔ اس کے علاوہ سابق جج جسٹس اندو ملہوترا کے بعد وہ یہ اعزاز حاصل کرنے والی دوسری خاتون بھی ہیں۔وی موہنا سپریم کورٹ میں طویل عرصے سے وکالت کر رہی ہیں اور کئی اہم مقدمات میں اپنی خدمات انجام دے چکی ہیں۔ وہ بھارتی فوج میں خواتین افسران کو مستقل کمیشن (Permanent Commission) دینے سے متعلق تاریخی مقدمے میں اہم قانونی کردار ادا کرنے والی وکلاء میں شامل رہی ہیں۔

جسٹس شیل ناگو کون ہیں؟

جسٹس شیل ناگواس وقت پنجاب و ہریانہ ہائی کورٹ کے چیف جسٹس ہیں، جب کہ ان کا بنیادی عدالتی پس منظر مدھیہ پردیش ہائی کورٹ سے وابستہ رہا ہے۔ وہ حال ہی میں جسٹس یشونت ورما سے متعلق مبینہ نقدی تنازعے کی جانچ کے لیے تشکیل دی گئی ان ہاؤس کمیٹی کے رکن بھی رہے ہیں۔

دیگر ججوں کا عدالتی تجربہ

جسٹس شری چندر شیکھر اس وقت بمبئی ہائی کورٹ کے چیف جسٹس ہیں اور اس سے قبل جھارکھنڈ ہائی کورٹ میں بھی خدمات انجام دے چکے ہیں۔ اسی طرح جسٹس سنجیو سچدیوا، جو فی الحال مدھیہ پردیش ہائی کورٹ کے چیف جسٹس ہیں، بنیادی طور پر دہلی ہائی کورٹ سے تعلق رکھتے ہیں اور طویل عدالتی تجربہ رکھتے ہیں۔دوسری جانب جسٹس ارون پلی جموں و کشمیر اور لداخ ہائی کورٹ کے چیف جسٹس ہیں۔ ان کا تعلق بھی پنجاب و ہریانہ ہائی کورٹ سے رہا ہے۔ 2019 میں جموں و کشمیر کی تنظیم نو کے بعد قائم ہونے والے جموں و کشمیر اور لداخ ہائی کورٹ کی قیادت میں انہوں نے اہم کردار ادا کیا ہے۔

عدالتی نظام کو ملے گی مزید مضبوطی

حال ہی میں سپریم کورٹ میں ججوں کی منظور شدہ تعداد میں اضافہ کیا گیا تھا، جس کے بعد نئی تقرریوں کا عمل شروع ہوا۔ قانونی ماہرین کا ماننا ہے کہ ان تقرریوں سے نہ صرف عدالت عظمیٰ کی افرادی قوت میں اضافہ ہوگا بلکہ مختلف ریاستوں اور عدالتی پس منظر رکھنے والے ججوں کی شمولیت سے عدالتی نظام کو متنوع تجربات اور قانونی مہارتوں کا فائدہ بھی حاصل ہوگا۔ان پانچ نئی تقرریوں کے بعد سپریم کورٹ کی صلاحیت میں اضافہ ہوگا اور ملک میں زیر التوا مقدمات کے جلد از جلد نمٹارے کی سمت میں ایک اہم قدم تصور کیا جا رہا ہے۔

بھارت ایکسپریس اردو