نائب صدر سی پی رادھا کرشنن نے اپنے مبارکبادی پیغام میں کہا کہ تلنگانہ اپنی متنوع ثقافت، زندہ روایات اور عوام کی تخلیقی صلاحیتوں کے لیے پورے ملک میں منفرد شناخت رکھتا ہے۔ انہوں نے کہا کہ ریاست کے عوام نے اپنی محنت، جدوجہد، اختراعی سوچ اور عزم کے ذریعے قومی ترقی میں اہم کردار ادا کیا ہے۔ ان کے مطابق یوم تاسیس کا یہ موقع عوام کو ریاست کی فلاح اور ''وکست بھارت'' کے خواب کو حقیقت میں بدلنے کے لیے مل کر کام کرنے کی ترغیب دیتا ہے۔وزیر اعظم نریندر مودی نے بھی تلنگانہ کے عوام کو مبارکباد دیتے ہوئے کہا کہ ریاست کے لوگ اپنی تخلیقی صلاحیتوں اور کاروباری ذہنیت کے لیے جانے جاتے ہیں۔ انہوں نے کہا کہ تلنگانہ کی تاریخ نہایت شاندار اور ثقافت قابل فخر ہے، جو بہادری، عزم اور جدوجہد کی علامت ہے۔ وزیر اعظم نے یقین دہانی کرائی کہ مرکزی حکومت ریاست کی ترقیاتی سفر میں مکمل تعاون جاری رکھے گی تاکہ ''وکست بھارت'' کے مشترکہ وژن کو عملی شکل دی جا سکے۔

وزیر اعظم نریندر مودی نے اپنے پیغام میں تلنگانہ کے عوام کی صحت، خوشحالی اور کامیابی کے لیے بھی پرارتھنا کی اور کہا کہ ریاست آئندہ برسوں میں مزید ترقی کی نئی منزلیں طے کرے گی۔ بھارتیہ جنتا پارٹی کے قومی صدر نتن نوین نے بھی ریاستی عوام کو مبارکباد دیتے ہوئے کہا کہ تلنگانہ اپنی عظیم ثقافتی شناخت اور متحرک عوامی جذبے کے باعث ملک بھر میں نمایاں مقام رکھتا ہے۔ انہوں نے امید ظاہر کی کہ ریاست ترقی اور خوشحالی کی راہ پر مسلسل آگے بڑھتی رہے گی اور عوام بہتر صحت اور خوشحال زندگی سے مستفید ہوں گے۔اس سے قبل مرکزی وزیر داخلہ امت شاہ نے بھی تلنگانہ یوم تاسیس پر مبارکباد پیش کرتے ہوئے کہا کہ ریاست اپنی منفرد ثقافت اور غیر معمولی صنعتی صلاحیتوں کے سبب قومی ترقی میں کلیدی کردار ادا کر رہی ہے۔ انہوں نے یقین ظاہر کیا کہ تلنگانہ مستقبل میں ترقی کی نئی بلندیوں کو چھوئے گا اور بھارت کی عزت و وقار میں مزید اضافہ کرے گا۔

بھارت ایکسپریس اردو