کلیان-احمد نگر شاہراہ پر بس اور اسکارپیو کی ٹکر، چار افراد ہلاک، دو بچوں سمیت چار زخمی

تھانے، 5 مئی (ہ س)۔ مہاراشٹر کے تھانے ضلع میں کلیان-احمد نگر شاہراہ پر ایک خوفناک سڑک حادثہ پیش آیا، جس میں چار افراد موقع پر ہی ہلاک ہو گئے جبکہ چار دیگر شدید زخمی ہو گئے۔ زخمیوں میں دو بچے بھی شامل ہیں، جنہیں قریبی سرکاری اسپتال میں داخل کرایا گیا ہے جہاں ان کا علاج جاری ہے۔ یہ حادثہ مورباد تعلقہ کے ویشاکھرے-ٹوکاواڑے علاقے میں اس وقت پیش آیا جب وٹھلواڑی سے احمد نگر جانے والی ریاستی ٹرانسپورٹ بس ایک اسکارپیو گاڑی سے آمنے سامنے ٹکرا گئی۔ بتایا جاتا ہے کہ بس آج صبح تقریباً ساڑھے آٹھ بجے وٹھلواڑی ڈپو سے روانہ ہوئی تھی۔

حکام کے مطابق تصادم اس قدر شدید تھا کہ دونوں گاڑیوں کے اگلے حصے مکمل طور پر تباہ ہو گئے۔ جائے حادثہ سے سامنے آنے والی تصاویر اور ویڈیوز میں نقصان کی شدت واضح طور پر دیکھی جا سکتی ہے، جس سے حادثے کی ہولناکی کا اندازہ لگایا جا رہا ہے۔ حادثے کے فوراً بعد مقامی افراد موقع پر پہنچ گئے اور انہوں نے امدادی کارروائیاں شروع کرتے ہوئے زخمیوں کو گاڑیوں سے باہر نکالا۔

اس کے بعد ایمرجنسی ٹیمیں بھی جائے حادثہ پر پہنچ گئیں اور زخمیوں کو فوری طور پر اسپتال منتقل کیا گیا۔ ابتدائی اطلاعات کے مطابق ہو سکتا ہے اوورٹیکنگ کے دوران یہ حادثہ پیش آیا تاہم اصل وجہ کا تعین ابھی ہونا باقی ہے۔ پولیس نے موقع پر پہنچ کر پنچنامہ کیا اور لاشوں کو پوسٹ مارٹم کے لیے سرکاری اسپتال منتقل کر دیا ہے، جبکہ مزید تحقیقات جاری ہیں۔