جموں, 16 مئی (ہ س)۔ جموں کے بشنہ اسمبلی حلقہ کے پاسگال گاؤں میں ایک رہائشی مکان میں اچانک آگ بھڑک اٹھی جس کے نتیجے میں لاکھوں روپے مالیت کا سامان جل کر راکھ ہوگیا۔اطلاعات کے مطابق درشنا دیوی زوجہ مرحوم ست پال کے مکان میں لگی آگ نے دیکھتے ہی دیکھتے پورے گھر کو اپنی لپیٹ میں لے لیا۔ واقعہ کے بعد علاقے میں افرا تفری مچ گئی جبکہ مقامی لوگ فوری طور پر مدد کے لیے موقع پر پہنچ گئے۔اطلاع ملنے پر محکمہ فائر اینڈ ایمرجنسی کی ٹیم جائے وقوعہ پر پہنچی اور کافی جدوجہد کے بعد آگ پر قابو پالیا، تاہم اس دوران گھر میں موجود بیشتر سامان مکمل طور پر تباہ ہوچکا تھا۔حکام کے مطابق آگ لگنے کی اصل وجہ فوری طور پر معلوم نہیں ہوسکی ہے اور معاملے کی تحقیقات جاری ہیں۔دریں اثنا، مقامی باشندوں اور متاثرہ خاندان نے انتظامیہ اور حکومت سے اپیل کی ہے کہ متاثرہ کنبے کو فوری مالی امداد اور راحتی سامان فراہم کیا جائے تاکہ انہیں اس مشکل وقت میں سہارا مل سکے۔

ہندوستھان سماچار

---------------

ہندوستان سماچار / محمد اصغر