علی گڑھ, 16 مئی (ہ س)۔

بہوجن سماج پارٹی کی بوتھ کمیٹی تشکیل کے سلسلے میں ایک اہم میٹنگ ہفتہ کو چھرہ اسمبلی حلقہ کے جلالی قصبہ میں منعقد ہوئی۔ میٹنگ میں بہوجن سماج پارٹی علی گڑھ منڈل کے چیف منڈل انچارج وجے سنگھ بطور مہمانِ خصوصی شریک ہوئے۔

اجلاس سے خطاب کرتے ہوئے وجے سنگھ نے کہا کہ کچھ سیاسی جماعتیں اور ان کے لیڈر آئے دن ذات پات پر مبنی نفرت انگیز تبصرے کرکے صوبے کے سماجی تانے بانے کو خراب کرنے کی کوشش کر رہے ہیں۔ انہوں نے الزام لگایا کہ ایسے بیانات کا مقصد سماج میں کشیدگی اور نفرت پیدا کرنا ہے۔

وجے سنگھ نے کہا کہ امن پسند عوام کو ایسے لوگوں کی حقیقت سمجھنے کی ضرورت ہے۔ انہوں نے کہا کہ بہوجن سماج پارٹی ہمیشہ بھائی چارہ، امن اور سماجی ہم آہنگی کی سیاست کرتی آئی ہے اور موجودہ وقت میں صوبے میں امن و سکون برقرار رکھنا سب سے بڑی ضرورت ہے۔

انہوں نے کہا کہ سماج کو تقسیم کرنے والی طاقتوں سے ہوشیار رہنے کی ضرورت ہے اور عوام کو ان جماعتوں کا ساتھ دینا چاہیے جو آئین اور سماجی اتحاد کو مضبوط کرنے کا کام کرتی ہیں۔

میٹنگ میں تنظیم کو مضبوط کرنے، بوتھ سطح تک کارکنان کو فعال بنانے اور آئندہ پروگراموں کے حوالے سے بھی تبادلہ خیال کیا گیا۔

اس موقع پر ضلع صدر رتن دیپ سنگھ، وجیندر سنگھ وکرم، جلالی چیئرمین فتح سنگھ کشواہا، منیش غازی سمیت پارٹی کے کئی عہدیداران، کارکنان اور مقامی افراد موجود رہے۔