پونے میں جدید کینسر اسپتال کا افتتاحممبئی ، 17 مئی (ہ س)۔ مہاراشٹر کے وزیراعلیٰ دیویندر فڑنویس نے اتوار کو پونے میں کہا کہ پبلک پرائیویٹ پارٹنرشپ کے تحت پونے میونسپل کارپوریشن کی جانب سے قائم کیا گیا جدید کینسر اسپتال صحت خدمات کے شعبے میں ایک اہم سنگ میل ثابت ہوگا۔ وزیراعلیٰ دیویندر فڑنویس پونے میونسپل کارپوریشن اور آپلکی ہیلتھ کیئر کے مشترکہ منصوبے سے قائم جدید کینسر اسپتال کی افتتاحی تقریب سے خطاب کر رہے تھے۔انہوں نے کہا کہ ملک میں کینسر کے معاملات میں تیزی سے اضافہ ہو رہا ہے، تاہم بروقت جانچ اور علاج کی صورت میں اس بیماری پر مکمل قابو پایا جا سکتا ہے۔فڑنویس نے کہا کہ علاج میں تاخیر کی صورت میں مریضوں کو طویل مدت تک علاج کروانا پڑتا ہے، جس سے مالی بوجھ بھی بڑھ جاتا ہے۔ اسی صورتحال کو مدنظر رکھتے ہوئے مرکزی اور ریاستی حکومت نے مختلف صحت اسکیموں میں کینسر علاج کو شامل کیا ہے تاکہ عام شہریوں کو وقت پر علاج کی سہولت میسر آ سکے۔انہوں نے بتایا کہ مہاراشٹر میں بڑے پیمانے پر ''کینسر گرڈ'' تیار کیا جا رہا ہے، جس کے ذریعے ریاست بھر کے مریضوں کو زیادہ مؤثر اور آسان علاج خدمات فراہم کی جائیں گی۔ان کے مطابق یہ گرڈ ریاست بھر میں صحت خدمات کو مزید مؤثر اور مربوط بنانے میں اہم کردار ادا کرے گا۔اس موقع پر نائب وزیراعلیٰ سنیترا پوار، اعلیٰ و تکنیکی تعلیم کے وزیر چندرکانت دادا پاٹل، میئر منجوشا ناگپورے، رکن پارلیمنٹ میدھا کلکرنی، رکن اسمبلی بھیمراؤ تاپکیر، رکن اسمبلی راہل کل، نائب میئر پرشورام واڈیکر اور میونسپل کمشنر نَو کشور رام بھی موجود تھے۔

ہندوستھان سماچار

ہندوستان سماچار / جاوید این اے