ترواننت پورم، 18 مئی (ہ س)۔
کانگریس کی قیادت والی یونائیٹڈ ڈیموکریٹک فرنٹ (یو ڈی ایف) قانون ساز پارٹی کے رہنما وڈاسیری دامودرن ستیشن (وی ڈی ستیشن) نے پیر کو وزیر اعلیٰ کے طور پر حلف لیا۔ ستیشن کے ساتھ 20 ایم ایل ایز نے بھی وزیر کے طور پر حلف لیا۔
گورنر راجندر وشو ناتھ ارلیکر نے یہاں سنٹرل اسٹیڈیم میں منعقدہ ایک تقریب میں کانگریس لیڈر ستیشن اور ان کے 20 وزراء کو عہدہ اور رازداری کا حلف دلایا۔ حلف اٹھانے والے وزراء میں کانگریس کے 11 اور انڈین یونین مسلم لیگ (آئی یو ایم ایل ) کے پانچ شامل ہیں۔ اس کے علاوہ، یو ڈی ایف حلقوں میں سے ایک ایک ایم ایل اے - کیرالہ کانگریس-جوزف، انقلابی سوشلسٹ پارٹی (آر ایس پی)، کیرالہ کانگریس- جیکب، اور کمیونسٹ پارٹی آف انڈیا (مارکسسٹ) (سی پی آئی-ایم) کو بطور وزیر مقرر کیا گیا ہے۔
وزیر اعظم نریندر مودی نے ستیشن کو وزیر اعلی کے عہدے کا حلف لینے پر مبارکباد دی۔ اپنے پیغام میں وزیر اعظم نے کہا کہ مرکزی حکومت عوام کی امنگوں کو پورا کرنے کے لیے کیرالہ کی نئی حکومت کو ہر ممکن تعاون فراہم کرے گی۔ انہوں نے ستیشن کی کامیاب مدت کار کی خواہش بھی کی۔
حلف برداری کی تقریب میں سابق وزیر اعلیٰ پنار ئی وجین، کانگریس صدر ملکارجن کھڑگے، لوک سبھا میں اپوزیشن لیڈر راہل گاندھی، کانگریس جنرل سکریٹری پرینکا گاندھی واڈرا، سابق اسمبلی اسپیکر اے این شمشیر، اور بھارتیہ جنتا پارٹی کے ریاستی صدر اور ایم ایل اے راجیو چندر شیکھر موجود تھے۔
اس تقریب میں کرناٹک کے وزیر اعلیٰ سدارامیا، نائب وزیر اعلیٰ ڈی کے شیوکمار، تلنگانہ کے وزیر اعلیٰ ریونت ریڈی، ہماچل پردیش کے وزیر اعلیٰ سکھویندر سنگھ سکھو، آئی یو ایم ایل کے ریاستی صدر سید صادق علی شہاب تھنگل، اور کیرالہ کانگریس لیڈر پی جے جوزف سمیت کئی سرکردہ لیڈران بھی موجود تھے۔
کانگریس کے جن ایم ایل اے کو وزیر بنایا گیا ہے ان میں رمیش چنیتھلا، سنی جوزف، کے مرلیدھرن، اے پی انیل کمار، پی سی وشنو ناتھ، روزی ایم جان، بندو کرشنا، ایم لیجو، ٹی صدیقی، کے اے تھلسی، او جے جنیش شامل ہیں۔ حلف لینے والے آئی یو ایم ایل ایم ایل ایز میں پی کے کنہالی کٹی، کے ایم شاجی، وی عبدالغفور، این شمس الدین، اور پی کے بشیر شامل ہیں۔ مزید برآں، کیرالہ کانگریس-جوزف کے مونس جوزف، آر ایس پی کے شیبو بیبی جان، کیرالہ کانگریس-جیکب کے انوپ جیکب، اور سی پی آئی (ایم) کے سی پی جان کو وزیر بنایا گیا ہے۔
ستیشن کابینہ میں کل 14 نئے چہروں کو شامل کیا گیا ہے۔ستیشن خود پہلی بار کسی سرکاری عہدے پر فائز ہوئے ہیں۔ وہ 2001 سے پاراوور اسمبلی حلقہ کی نمائندگی کر رہے ہیں۔ کابینہ میں دو خواتین وزیر اور درج فہرست ذات برادری کے دو ارکان بھی شامل ہیں۔
نئی ٹیم میں آئی یو ایم ایل کے این شمس الدین، کے ایم شازی، پی کے بشیر، اور وائی عبدالغفور پہلی بار وزیر بنے ہیں۔ کانگریس قائدینپی سی وشنو ناتھ، روزی ایم جان، بندو کرشنا، ٹی صدیقی، کے اے تلسی، اور او جے جنیش کو بھی پہلی بار وزراء کی کونسل میں شامل کیا گیا ہے۔
تقریب حلف برداری کے دوران سینٹرل اسٹیڈیم کھچا کھچ بھرا ہوا تھا۔ وزراء نے ایک ایک کر کے حلف اٹھایا تو پورا کمپلیکس نعروں اور تالیوں سے گونج اٹھا۔ ریاست بھر سے کانگریس اور یو ڈی ایف کے حامیوں کی آمد کے ساتھ ہی تقریب ایک بڑے سیاسی طاقت کے مظاہرے میں بدل گئی۔
قابل ذکر ہے کہ 140 رکنی کیرالہ اسمبلی کے لیے ووٹنگ 9 اپریل کو ہوئی تھی، جس کے نتائج کا اعلان 4 مئی کو کیا گیا تھا۔ یو ڈی ایف نے انتخابات میں شاندار کارکردگی کا مظاہرہ کرتے ہوئے 102 نشستیں حاصل کیں۔ لیفٹ ڈیموکریٹک فرنٹ (ایل ڈی ایف) نے 35 نشستیں حاصل کیں، جب کہ بی جے پی نے تین نشستیں حاصل کیں۔
یو ڈی ایف کی اس فیصلہ کن جیت کے ساتھ ہی ریاست میں ایک دہائی کے بعد اقتدار میں تبدیلی آئی ہے۔ نئی حکومت کو اب ریاست کی معاشی صورتحال، روزگار، بنیادی ڈھانچے اور سماجی بہبود سے متعلق مسائل کو حل کرنے کے اہم چیلنج کا سامنا کرنا پڑے گا۔
ہندوستھان سماچار
ہندوستان سماچار / عطاءاللہ