جموں, 18 مئی (ہ س)۔

جموں و کشمیر میں کانگریس پارٹی اور نیشنل کانفرنس کے درمیان اتحاد میں بڑے اختلافات سامنے آنے لگے ہیں۔ کانگریس کے کئی رہنماؤں نے پارٹی ہائی کمان سے نیشنل کانفرنس کے ساتھ اتحاد پر نظرثانی کرنے کی اپیل کی ہے۔جموں دیہی ضلع کانگریس صدر نیرج کندن نے کہا کہ حال ہی میں ہماچل پردیش کے کانگڑا میں منعقدہ اجلاس کے دوران جموں و کشمیر کے تقریباً 19 ضلع صدور نے پارٹی قیادت سے نیشنل کانفرنس کے ساتھ اتحاد ختم کرنے کا مطالبہ کیا۔نیرج کندن نے الزام عائد کیا کہ اسمبلی انتخابات کے دوران اور بعد میں کیے گئے وعدوں کے برخلاف اب تک اتحادی جماعتوں کی رابطہ کمیٹی تشکیل نہیں دی گئی، جس سے جموں و کشمیر میں کانگریس قیادت کو مسلسل نظر انداز کیے جانے کا تاثر ملتا ہے۔انہوں نے کہا کہ کانگریس نے سڑک سے لے کر پارلیمنٹ تک جموں و کشمیر کی ریاستی حیثیت کی بحالی کے لیے مسلسل جدوجہد کی، مگر اتحادی جماعت کی جانب سے اس معاملے میں خاطر خواہ حمایت نہیں ملی۔انہوں نے مزید کہا کہ ریاستی درجے کی بحالی جیسے اہم مسئلے پر خاموشی نیشنل کانفرنس کی سنجیدگی اور عوام کے آئینی و جمہوری حقوق کے تحفظ کے عزم پر سوالیہ نشان کھڑا کرتی ہے۔

ہندوستھان سماچار

---------------

ہندوستان سماچار / محمد اصغر