بھونیشور، 18 مئی (ہ س)۔ بی جے پی کے قومی صدر نتن نوین اڈیشہ کے دورے پر ہیں۔پیر کی صبح بھونیشور میں بی جے پی کے ریاستی دفتر میں منعقدہ پارٹی کی ریاستی کور کمیٹی کی میٹنگ میں شریک ہوئے۔ میٹنگ میں وزیراعلیٰ موہن چرن ماجھی سمیت پارٹی کے کئی سینئر لیڈر موجود تھے۔ پارٹی ذرائع کے مطابق میٹنگ میں تنظیمی سرگرمیوں، ریاست کی اقتصادی ترقی اور مختلف سیاسی و انتظامی امور پر تفصیلی تبادلہ خیال کیا گیا۔

مرکزی وزیر دھرمیندر پردھان، جوال اورام، بی جے پی کے ریاستی صدر اور ایم پی منموہن سامل، بی جے پی اڈیشہ انچارج وجے پال سنگھ تومر، شریک انچارج لتا اسےنڈی، نائب وزیر اعلیٰ کنک وردھن سنگھ دیو اور نائب وزیر اعلیٰ پربھاوتی پریڈا بھی میٹنگ میں موجود تھے۔

اس کے علاوہ بی جے پی ریاستی تنظیم کے جنرل سکریٹری مانس مہنتی، ایم پی پرتاپ سارنگی، ڈاکٹر سمبت پاترا اور دیگر سینئر لیڈروں نے بھی میٹنگ میں شرکت کی۔

میٹنگ کے بعد وزیر اعلیٰ موہن چرن ماجھی نے سوشل میڈیا پر کہا کہ بی جے پی کے قومی صدر نتن نوین کی موجودگی میں منعقدہ ریاستی کور کمیٹی کی میٹنگ میں تنظیمی کام کے سلسلے میں سینئر لیڈروں کے ساتھ بامعنی بات چیت ہوئی۔

وزیر اعلیٰ نے کہا کہ وزیر اعظم نریندر مودی کی دور اندیش قیادت میں ریاست کی ڈبل انجن والی حکومت اڈیشہ کی ہمہ جہت ترقی، سماجی تحفظ اور اقتصادی ترقی کو ایک نئی سمت فراہم کرنے کے لیے پرعزم ہے۔ انہوں نے مزید کہا کہ حکومت ہر شہری کی فلاح و بہبود کو یقینی بنانے اور عالمی سطح پر اڈیشہ کی قابل فخر شناخت قائم کرنے کے لیے مسلسل کام کر رہی ہے۔