سوشل میڈیا پر ویڈیو وائرل ہونے کے بعد پولیس نے موٹر سائیکل کو ضبط کیا

جموں، 19 مئی (ہ س)۔ جموں میں ایک موٹر سائیکل پر سات افراد کو سوار کرکے سڑکوں پر گھومنے اور اس کی ویڈیو سوشل میڈیا پر وائرل کرنے والے نوجوان کے خلاف جموں ٹریفک پولیس نے کارروائی کرتے ہوئے موٹر سائیکل ضبط کر لی۔ پولیس کے مطابق وائرل ویڈیو کا نوٹس لیتے ہوئے تحقیقات شروع کی گئیں، جس دوران کئی سنگین ٹریفک قوانین کی خلاف ورزیاں سامنے آئیں۔

تحقیقات میں معلوم ہوا کہ موٹر سائیکل چلانے والے کی شناخت محرم علی کے طور پر ہوئی ہے، جو اتر پردیش کا رہائشی ہے اور فی الحال جموں کے پرکھو علاقے میں مقیم ہے۔ پولیس نے بتایا کہ اس کے پاس ڈرائیونگ لائسنس بھی موجود نہیں تھا۔حکام کے مطابق ٹریفک قوانین کی مسلسل خلاف ورزی پر اس کے خلاف پہلے ہی سات چالان درج کیے جا چکے ہیں، جبکہ آر ٹی او جموں نے حال ہی میں موٹر سائیکل کی رجسٹریشن بھی معطل کر دی تھی۔

ڈی ایس پی ٹریفک سٹی جموں اشونی شرما نے بتایا کہ ویڈیو وائرل ہونے کے بعد فوری کارروائی کرتے ہوئے موٹر سائیکل کو سیز کیا گیا۔ انہوں نے کہا کہ اگر نوجوان موقع پر سات افراد کے ساتھ پکڑا جاتا تو اس کے خلاف مقدمہ درج کرکے گرفتار بھی کیا جا سکتا تھا۔ پوچھ گچھ کے دوران محرم علی نے بتایا کہ وہ محلے کے چند لڑکوں کے ساتھ نہانے کے لیے جا رہا تھا، اسی دوران کسی نے ویڈیو بنا کر سوشل میڈیا پر اپ لوڈ کر دی۔ ٹریفک پولیس نے واضح کیا ہے کہ سڑکوں پر اسٹنٹ بازی اور ٹریفک قوانین کی خلاف ورزی کرنے والوں کے خلاف آئندہ بھی سخت کارروائی جاری رہے گی۔