نوشہرہ میں پرنم آنکھوں کے ساتھ فوجی جوان کی آخری رسومات ادا کی گئیں

جموں، 19 مئی (ہ س)۔ بھارتی فوج اور مقامی لوگوں نے منگل کے روز ضلع راجوری کے نوشہرہ سب ڈویژن کے لَمّن گاؤں سے تعلق رکھنے والے فوجی جوان انل چودھری کو پُرنم آنکھوں کے ساتھ آخری الوداع کیا۔ اطلاعات کے مطابق انل چودھری ڈوڈہ میں کاؤنٹر انسرجنسی فورس ڈیلٹا میں تعینات تھے، جہاں دورانِ ڈیوٹی اُن کی طبیعت اچانک خراب ہوگئی۔ انہیں فوری طور پر آرمی اسپتال منتقل کیا گیا تاہم وہ دورانِ علاج انتقال کر گئے۔منگل کو فوجی جوان کی میت جب اُن کے آبائی گاؤں لائی گئی تو علاقے میں غم کی فضا چھا گئی۔

بھارتی فوج کی جانب سے مکمل فوجی اعزاز کے ساتھ آخری رسومات ادا کی گئیں۔ اس دوران سینئر فوجی افسران نے شہید جوان کے تابوت پر پھول چڑھائے اور پھولوں کی چادر پیش کرکے خراجِ عقیدت ادا کیا۔آخری رسومات میں علاقے کے ہزاروں لوگوں نے شرکت کی اور انل چودھری کو زبردست خراجِ عقیدت پیش کیا۔ اس موقع پر وطن کی خدمت میں اُن کی قربانی اور خدمات کو سراہا گیا۔بی جے پی لیڈر رویندر رینا نے بھی شہید فوجی جوان کو خراجِ عقیدت پیش کرتے ہوئے اُن کے اہلِ خانہ سے تعزیت کا اظہار کیا۔

ہندوستھان سماچار

--------------

ہندوستان سماچار / محمد اصغر