جموں, 23 مئی (ہ س)۔
جموں و کشمیر کے ضلع راجوری میں ہفتہ کے روز سیکورٹی فورسز اور دہشت گردوں کے درمیان اُس وقت جھڑپ شروع ہوگئی جب مشتبہ دہشت گردوں کی موجودگی کی اطلاع کے بعد بڑے پیمانے پر محاصرہ اور تلاشی آپریشن شروع کیا گیا۔
ابتدائی اطلاعات کے مطابق علاقے میں دو سے تین دہشت گردوں کی نقل و حرکت دیکھی گئی تھی، جس کے بعد فورسز کو فوری طور پر متحرک کیا گیا۔وائٹ نائٹ کور کی جانب سے سوشل میڈیا پلیٹ فارم ایکس پر جاری بیان میں کہا گیا کہ گمبھیر مغلاں علاقے میں صبح تقریباً ساڑھے گیارہ بجے انٹیلی جنس بنیادوں پر فوج، جموں و کشمیر پولیس اور سی آر پی ایف کے مشترکہ آپریشن کے دوران دہشت گردوں سے رابطہ قائم ہوا۔
بیان کے مطابق سیکورٹی اہلکاروں نے فوری اور منظم کارروائی کرتے ہوئے دہشت گردوں کا مقابلہ کیا، جس کے بعد فائرنگ کا تبادلہ شروع ہوگیا۔فوج نے بتایا کہ آپریشن شیروالی کے تحت علاقے کا مؤثر محاصرہ کر لیا گیا ہے اور تلاشی کارروائیاں مسلسل جاری ہیں۔ذرائع کے مطابق ڈوریمل-گمبھیر مغلاں بیلٹ میں دہشت گردوں کی موجودگی سے متعلق خفیہ اطلاع ملنے پر فوج، جموں و کشمیر پولیس اور مرکزی ریزرو پولیس فورس کی مشترکہ ٹیم نے پورے علاقے کو گھیرے میں لے کر وسیع پیمانے پر سرچ آپریشن شروع کیا۔ تاہم ابھی تک کسی جانی نقصان کی اطلاع موصول نہیں ہوئی ہے۔
ہندوستھان سماچار
---------------
ہندوستان سماچار / محمد اصغر