تھانے ، 24 مئی (ہ س) مہاراشٹر کے ضلع تھانے کے ٹٹوالا علاقے میں اتوار کی صبح بیوی کا قتل کرنے والے شوہر کو پولیس نے گرفتار کر لیا۔ اس معاملے کی مزید تفتیش ٹٹوالا پولیس اسٹیشن کی ٹیم کر رہی ہے۔ پولیس کے مطابق ٹٹوالا علاقے میں ستیش واگھے اپنی بیوی ساریکا عرف رخسار واگھے کے ساتھ رہتا تھا۔ ستیش کو اپنی بیوی کے کردار پر شک تھا، جس کی وجہ سے دونوں کے درمیان اکثر جھگڑے ہوا کرتے تھے۔ اتوار کی صبح بھی دونوں کے درمیان کسی بات پر شدید تکرار ہوئی۔بحث بڑھنے کے بعد ستیش واگھے نے غصے میں آکر گھر میں رکھے گملے سے اپنی بیوی کے سر پر زور دار حملہ کر دیا۔ اس حملے میں ساریکا عرف رخسار واگھے شدید زخمی ہو گئی۔ اہل خانہ نے اسے فوری طور پر قریبی اسپتال منتقل کیا، تاہم ڈاکٹروں نے معائنہ کے بعد اسے مردہ قرار دے دیا۔ واقعے کی اطلاع ملتے ہی ٹٹوالا پولیس فوراً جائے وقوع پر پہنچی اور ملزم ستیش واگھے کو گرفتار کر لیا۔ پولیس نے قتل کا مقدمہ درج کر کے معاملے کی مزید باریک بینی سے جانچ شروع کر دی ہے۔

ہندوستھان سماچار

--------------------

ہندوستان سماچار / جاوید این اے