اجلاس میں ریاست کے وزیر اعلیٰ شبھیندو ادھیکاری کے علاوہ سشستر سیما بل(ایس ایس بی)، بارڈر سکیورٹی فورس(بی ایس ایف) اور ریاستی پولیس کے اعلیٰ افسران بھی موجود تھے۔ اس دوران 'تین سطحی سکیورٹی گرڈ' کے تحت مربوط نگرانی کے نظام کو مزید مضبوط بنانے پر خصوصی زور دیا گیا۔ امیت شاہ نے واضح پیغام دیا کہ شمالی بنگال کی سرحدوں سے کسی بھی قسم کی دراندازی برداشت نہیں کی جائے گی۔

سلی گڑی کوریڈور بھارت کے لیے انتہائی اہم اسٹریٹجک حیثیت رکھتا ہے۔ یہ ایک تنگ زمینی راستہ ہے جو شمال مشرقی ریاستوں کو ملک کے باقی حصوں سے جوڑتا ہے۔ یہی وجہ ہے کہ مرکزی حکومت اس علاقے کی سکیورٹی کو لے کر خاصی محتاط ہے۔اجلاس میں سرحد پر باڑ لگانے کا کام جلد مکمل کرنے پر بھی زور دیا گیا۔ جدید ٹیکنالوجی سے لیس تین سطحی سکیورٹی نظام اور اسمارٹ باڑ لگانے کے منصوبے پر بھی غور کیا گیا۔ ایس ایس بی کو سرحدی نگرانی کے نظام کو مزید مؤثر بنانے کی ہدایت دی گئی ہے۔مغربی بنگال میں حالیہ دنوں میں پاکستان کے لیے جاسوسی کے الزام میں متعدد افراد کی گرفتاری اور شمالی بنگال سے مشتبہ سرگرمیوں کی اطلاعات کے بعد سرحدی سکیورٹی کو لے کر تشویش میں اضافہ ہوا ہے۔ اس کے علاوہ پڑوسی ملک نیپال کے راستے بھارت میں نیٹ ورک قائم کرنے کی مبینہ سازش سے متعلق خفیہ اطلاعات نے بھی سکیورٹی ایجنسیوں کی تشویش بڑھائی ہے۔اسی پس منظر میں سلی گڑی کوریڈور کی سکیورٹی مزید مضبوط بنانے پر مرکزی حکومت کی خصوصی توجہ ہے۔

سرحد پر باڑ لگانے کے لیے زمین دستیاب کرانے کے عمل میں بھی تیزی لائی گئی ہے۔ دعویٰ کیا گیا ہے کہ ریاست میں نئی حکومت کے اقتدار سنبھالنے کے بعد ابتدائی 45 دنوں کے اندر سکیورٹی فورسز کو 1129 ایکڑ زمین منتقل کی گئی ہے۔ اس کے علاوہ مزید 29 ایکڑ زمین منتقل کرنے کا عمل بھی جاری ہے۔اس سے سرحد پر باڑ لگانے کے کام میں تیزی آنے کی توقع ہے۔اس سے ایک روز قبل، جمعہ کو امت شاہ نے سلی گڑی کے رانی ڈانگا میں واقع ایس ایس بی کے نارتھ بنگال فرنٹیئر ہیڈکوارٹر میں منعقدہ پروگرام میں شرکت کی تھی۔ اس دوران تقریباً 189 کروڑ روپے کی لاگت والے متعدد انتظامی، رہائشی اور تکنیکی بنیادی ڈھانچے کے منصوبوں کا افتتاح اور سنگ بنیاد رکھا گیا۔

سرحدی سکیورٹی کو مزید مضبوط بنانے کے لیے ریاست میں 10 نئی سرحدی چوکیوں کے قیام کا بھی اعلان کیا گیا ہے، جن میں سے دو چوکیاں شمالی بنگال میں قائم کی جائیں گی۔

مرکزی حکومت کا مقصد ان اقدامات کے ذریعے سلی گڑی کوریڈور کو دراندازی، غیر قانونی سرگرمیوں اور دیگر سکیورٹی چیلنجز سے محفوظ بنانا ہے۔

ہندوستھان سماچار

ہندوستان سماچار / Mohammad Khan