سنجے سنگھ نے راجدھانی لکھنؤ میں پارٹی دفتر میں منعقدہ پریس کانفرنس کے دوران کہا کہ سیاست اب ذات پات اور مذہب کے جال سے نکل کر تعلیم اور روزگار پر توجہ کی طرف آ رہی ہے۔ یہ ملک کے روشن مستقبل کی نشانی ہے۔ مبینہ طور پر اتر پردیش کے 55 سرکاری اسکولوں کی ویڈیوز دکھاتے ہوئے انہوں نے کہا کہ یہ ویڈیوز 'آپریشن کایاکلپ' کے ذریعے اسکولوں کی حالت بدلنے کی حقیقت کو جھٹلا رہے ہیں۔ سنجے سنگھ نے دعویٰ کیا کہ وارانسی، گورکھپور، نوئیڈا، غازی آباد، علی گڑھ اور مہوبہ جیسے اضلاع میں اسکولوں کی چھتیں ٹپک رہی ہیں۔ بیت الخلا ٹوٹ پھوٹ کا شکار ہیں اور بچوں کے پاس بیٹھنے کے لیے میز اور بینچ تک نہیں ہیں۔

ایم پی سنجے سنگھ نے کہا کہ بابا صاحب امبیڈکر نے تعلیم کو شیرنی کا دودھ کہا تھا لیکن بی جے پی چاہتی ہے کہ غریب بچے ناخواندہ رہیں تاکہ وہ اپنے حقوق کے لیے دہاڑ نہ سکیں۔ رکن پارلیمنٹ نے الزام لگایا کہ وزیر اعلیٰ یوگی جانتے ہیں کہ مذہب کے نام پر نفرت پھیلانے سے ووٹ حاصل ہوں گے۔ اس لیے وہ اسکولوں اور سڑکوں پر توجہ دینے کے بجائے معاشرے کو تقسیم کرنے کی سیاست کھیل رہے ہیں۔ ایم پی نے کہا کہ پارٹی پورے اترپردیش میں خستہ حال اسکولوں کی نمائش منعقد کرے گی تاکہ عوام بی جے پی کے دعووں اور حقیقت میں فرق دیکھ سکیں۔

ہندوستھان سماچار

ہندوستان سماچار / محمد شہزاد