اس آفر میں 2,500.00 ملین روپے یعنی 250 کروڑ روپے تک کا تازہ شیئر اجرا اور پروموٹر سیلنگ شیئر ہولڈرز کی جانب سے 11,848,340 تک ایکویٹی شیئرز کی فروخت شامل ہے۔ اس میں آشیش اگروال کے ذریعے 5,924,170 تک ایکویٹی شیئرز اور سیما اگروال کے ذریعے 5,924,170 تک ایکویٹی شیئرز فروخت کیے جائیں گے۔تازہ شیئر اجرا سے حاصل ہونے والی 2,500.00 ملین روپے یعنی 250 کروڑ روپے کی رقم کمپنی کی طویل مدتی ورکنگ کیپیٹل ضروریات پوری کرنے، انوینٹری کی خریداری، دیکھ بھال اور توسیع، عمومی کارپوریٹ مقاصد اور آفر کے اخراجات کے لیے استعمال کی جائے گی۔

یہ آفر سیکورٹیز اینڈ ایکسچینج بورڈ آف انڈیا کے کیپٹل اور ڈسکلوزر ریکوائرمنٹس ریگولیشنز 2018 کے مطابق بک بلڈنگ کے عمل کے ذریعے کی جا رہی ہے۔ آفر کا زیادہ سے زیادہ 50 فیصد حصہ اہل ادارہ جاتی خریداروں کے لیے، کم از کم 15 فیصد حصہ غیر ادارہ جاتی بولی دہندگان کے لیے اور کم از کم 35 فیصد حصہ خوردہ انفرادی بولی دہندگان کے لیے دستیاب ہوگا۔

2016 میں قائم ہونے والی دیپا جیولرز لمیٹڈ ایک منظم بی ٹو بی ڈیزائنر، پروسیسر اور ہال مارک شدہ سونے کے زیورات کی سپلائر کمپنی ہے۔ کمپنی کا کاروبار بنیادی طور پر تلنگانہ، کرناٹک، آندھرا پردیش، تمل ناڈو اور کیرالہ میں پھیلا ہوا ہے۔ایک رپورٹ کے مطابق کمپنی وڈانم اور سی این سی مشین کٹ چوڑیوں کی ایک اہم پروسیسر اور سپلائر ہے اور زیورات کی ریٹیل چینز اور آزاد اسٹورز کو مصنوعات فراہم کرتی ہے۔ یہ کمپنی براہ راست حتمی صارفین کو زیورات فروخت کرنے کے بجائے ریٹیل چینز اور آزاد اسٹورز جیسے دیگر کاروباری اداروں کو زیورات کی ڈیزائننگ، تیاری اور سونے کے زیورات کی فراہمی کرنے والی منظم بی ٹو بی کمپنی ہے۔

کمپنی 22 کیریٹ سونے کے زیورات تیار کرنے اور فراہم کرنے، جاب ورک خدمات دینے اور زیورات و متعلقہ مصنوعات کی تجارت کے کاروبار میں سرگرم ہے۔ کمپنی مختلف اقسام کے ہال مارک شدہ سادہ سونے کے زیورات اور قیمتی پتھروں سے جڑے زیورات ڈیزائن، پروسیس اور فروخت کرتی ہے۔ کمپنی کی مصنوعات میں بنیادی طور پر وڈانم یعنی کمر بند، سی این سی مشین کٹ چوڑیاں، مردوں کے کڑے، وانکی یعنی بازوبند، ڈانڈ پٹی، گنڈلاملا ہارم یعنی روایتی ہار، گنڈلاملا نیکلیس، کنگن، بالیاں، مانگ ٹیکا یعنی ماتھے کی زنجیر یا بندی، مٹیل یعنی کان کی زنجیر، چمپا سرلو، جڑا یعنی چوٹی کے زیورات، انگوٹھیاں، بریسلیٹس اور قیمتی پتھروں والی انگوٹھیاں شامل ہیں۔

زیورات کی پروسیسنگ کے بنیادی کاروبار کے علاوہ کمپنی جاب ورک کے کام بھی کرتی ہے۔ اس میں صارفین کی جانب سے فراہم کیے گئے خام مال کو پروسیس کرکے تیار شدہ زیورات واپس صارفین کو دیے جاتے ہیں۔ اس کے علاوہ کمپنی چاندی کے زیورات، 18 اور 20 کیریٹ سونے کے زیورات، قیمتی پتھروں اور گولڈ بلین یعنی سونے کے سکوں اور بسکٹوں کی تجارت بھی کرتی ہے۔ 31 جولائی 2026 تک کمپنی کے پروڈکٹ پورٹ فولیو میں مختلف زمروں میں 16 مصنوعات اور 110 ایس کے یوز شامل تھے۔

31 جولائی 2026 تک کمپنی کا صارفین کا نیٹ ورک بھارت کی 13 ریاستوں اور 1 مرکز کے زیر انتظام خطے میں پھیلا ہوا تھا۔ کمپنی کے مجموعی صارفین کی تعداد 373 تھی، جن میں 47 زیورات کی ریٹیل چینز اور 326 آزاد اسٹورز شامل تھے۔ کمپنی کے تخلیقی ڈیزائنرز کی ٹیم کی مدد سے مختلف مصنوعات کے ڈیزائن کا وسیع پورٹ فولیو برقرار رکھا جاتا ہے۔ مختلف مصنوعات کے زمروں اور ڈیزائنرز کی ٹیم کی طاقت کی بنیاد پر کمپنی نے جویا لوکاس انڈیا لمیٹڈ، کلیان جیولرز انڈیا لمیٹڈ اور للیتا جیولری مارٹ لمیٹڈ جیسی بڑی ریٹیل چینز اور آزاد اسٹورز کے ساتھ طویل مدتی تعلقات قائم کیے ہیں۔ اعلیٰ کاریگری اور مصنوعات کے معیار کو مستقل برقرار رکھنے کے لیے کمپنی نے کوالٹی کنٹرول اور کوالٹی اشورنس کا مضبوط نظام بھی نافذ کیا ہے۔

ہندوستھان سماچار

--------------------

ہندوستان سماچار / جاوید این اے