راجکوٹ، 9 اکتوبر(ہ س)۔
تجربہ کار آل راؤنڈر رویندر جڈیجا کو رنجی ٹرافی 2026-27 کے پہلے مقابلے کے لیے سوراشٹر کی ٹیم میں شامل کیا گیا ہے۔ جے دیو انادکٹ کی کپتانی میں سوراشٹر کی 16 رکنی ٹیم 11 اکتوبر سے چھتیس گڑھ کے خلاف اپنی مہم کا آغاز کرے گی۔ جڈیجا حال ہی میں ویسٹ انڈیز کے خلاف ہندوستان کی ون ڈے سیریز میں کھیلے تھے، جس میں ہندوستانی ٹیم نے 2-1 سے کامیابی حاصل کی تھی۔ جڈیجا دو میچوں میں صرف دو وکٹیں لے سکے اور انہیں بلے بازی کا موقع نہیں ملا۔ رنجی ٹرافی میں کھیلنے سے انہیں نیوزی لینڈ کے آئندہ دورے پر ہونے والے دو ٹیسٹ میچوں سے پہلے ریڈ بال کرکٹ میں اپنی فارم اور لے حاصل کرنے میں مدد ملے گی۔ہندوستان کو نیوزی لینڈ میں پہلا ٹیسٹ 19 سے 23 نومبر تک ویلنگٹن اور دوسرا ٹیسٹ 27 نومبر سے یکم دسمبر تک کرائسٹ چرچ میں کھیلنا ہے۔رنجی ٹرافی کا 92واں ایڈیشن 11 اکتوبر سے شروع ہوگا۔ سابق چمپئن سوراشٹر کو ایلیٹ گروپ بی میں آندھرا، آسام، چھتیس گڑھ، حیدرآباد، کرناٹک، پنجاب اور تریپورہ کے ساتھ رکھا گیا ہے۔ سوراشٹر اور چھتیس گڑھ کے درمیان مقابلہ راجکوٹ کے نرنجن شاہ اسٹیڈیم میں کھیلا جائے گا۔
جے دیو انادکٹ کی کپتانی میں سوراشٹر نے 2019-20 اور 2022-23 میں رنجی ٹرافی کا خطاب جیتا تھا۔ ٹیم نے گزشتہ سیزن کے اپنے 14 کھلاڑیوں کو برقرار رکھا ہے۔ تاہم، 2025-26 کے سیزن میں سوراشٹر کی ٹیم گروپ مرحلے میں ہی باہر ہوگئی تھی۔ اس بار ٹیم بہتر کارکردگی کے ارادے سے میدان میں اترے گی۔
انادکٹ حال ہی میں انگلینڈ میں سسیکس کی جانب سے شاندار کارکردگی کا مظاہرہ کرکے لوٹے ہیں۔ انہوں نے سات میچوں میں 22.21 کی اوسط سے 28 وکٹیں حاصل کیں۔ اس دوران ہیمپشائر کے خلاف 32 رن دے کر پانچ وکٹیں لینا ان کی نمایاں کارکردگی رہی۔ اس کے علاوہ انہوں نے دو مرتبہ ایک اننگز میں چار وکٹیں بھی حاصل کیں۔سوراشٹر کی سلیکشن کمیٹی نے تیز گیند باز نیل پانڈیا اور آل راؤنڈر ارتھ یادو کو پہلی بار ٹیم میں جگہ دی ہے۔ ہاروک دیسائی وکٹ کیپر کی ذمہ داری سنبھالیں گے، جبکہ ارپت واسواڈا، چراغ جانی اور جے گوہل جیسے تجربہ کار کھلاڑی بلے بازی کے شعبے کو مضبوطی فراہم کریں گے۔
تیز گیند بازی کی ذمہ داری انادکٹ کے ساتھ بائیں ہاتھ کے گیند باز چیتن سکاریا سنبھالیں گے۔ تجربہ کار بائیں ہاتھ کے اسپنر دھرمیندر سنگھ جڈیجا اب سوراشٹر کے بجائے چھتیس گڑھ کی نمائندگی کریں گے۔ ان کی روانگی کے بعد اس سیزن میں پارتھ بھوت پر اسپن گیند بازی کی اضافی ذمہ داری ہوگی۔
سوراشٹر کی ٹیم: جے دیو انادکٹ(کپتان)، رویندر جڈیجا، ہاروک دیسائی(وکٹ کیپر)، ارپت واسواڈا، چراغ جانی، پریرک مانکڑ، جے گوہل، چیتن سکاریا، انکور پوار، سمر گجّر، پارتھ بھوت، وشوراج سنگھ جڈیجا، ہیتوک کوٹک، نیل پانڈیا، ارتھ یادو اور ترنگ گوہل۔
ہندوستھان سماچار
ہندوستان سماچار / Mohammad Khan