آنجہانی رام گووند چودھری کو خراجِ عقیدت پیش کرنے بلیا پہنچے اکھلیش یادو نے کہا کہ ذرا سوچیے کہ بی جے پی نے ایودھیا کی کیا حالت کر دی ہے۔ ایودھیا آج ایک بین الاقوامی شہر بن سکتا تھا، لیکن تمام وسائل اور انتظامی اختیارات ہونے کے باوجود وہاں کچھ نہیں ہوا۔

انہوں نے الزام لگایا کہ ایودھیا کے باشندوں سے ان کی دکانیں اور مکانات چھین لیے گئے اور انہیں بازار کی قیمت کے مطابق معاوضہ بھی نہیں دیا گیا۔ اس کے باوجود اگر وزیراعلیٰ ایودھیا سے انتخاب لڑنے کے بارے میں پُراعتماد ہیں تو میں انہیں چیلنج نہیں، بلکہ مشورہ دوں گا کہ وہ وہیں سے انتخاب لڑیں۔

اکھلیش یادو نے کہا کہ بی جے پی نے پورے اتر پردیش میں کچھ نہیں کیا۔ وزیراعلیٰ کے اپنے شہر میں کشتی چل رہی ہے، جبکہ پہلے دعویٰ کیا جاتا تھا کہ وہاں اسپین جیسا ماحول بنا دیا گیا ہے۔

ایودھیا میں رام للا کے درشن کے سوال پر کیا کہا؟

ایودھیا میں رام مندر جا کر درشن نہ کرنے کے سوال پر اکھلیش یادو نے کہا کہ کیداریشور مندر کی تعمیر مکمل ہونے کے بعد وہ ایودھیا جا کر رام للا کے درشن کریں گے۔

انہوں نے سناتن دھرم کو سچائی اور خدمت کا راستہ قرار دیا۔ ان کے مطابق، سناتن روایت سماج وادی راستہ ہے اور بھائی چارے کا پیغام دیتی ہے۔ یہ روایت 'وسودھیو کٹمبکم' یعنی پوری دنیا ایک خاندان ہے، کا راستہ دکھاتی ہے۔

اکھلیش یادو نے کہا کہ ہم سب بھائی چارے پر یقین رکھنے والے لوگ ہیں۔ انہوں نے طنز کرتے ہوئے کہا کہ جو لوگ خود کو سناتنی ہونے کا سرٹیفکیٹ دیتے ہیں، ان کے دور میں ہی ایودھیا میں چڑھاوے کی رقم کی چوری کا واقعہ پیش آیا۔

انہوں نے الزام لگایا کہ ایودھیا میں لوگوں کے مکانات توڑ دیے گئے، لیکن انہیں بازار کی قیمت کے مطابق معاوضہ نہیں دیا گیا۔

یوگی حکومت اور امریکہ کی پالیسیوں پر تنقید

وزیراعلیٰ یوگی آدتیہ ناتھ کو نشانہ بناتے ہوئے اکھلیش یادو نے کہا کہ جو لوگ ایودھیا جانے کا عالمی ریکارڈ بنانے کا دعویٰ کرتے ہیں، انہیں بتانا چاہیے کہ وہاں چندے کی مبینہ چوری کا ذمہ دار کون ہے۔

انہوں نے سوال اٹھایا کہ سماج وادی مفکر جے پرکاش نارائن (جے پی) کے نام پر لکھنؤ میں بنایا گیا 20 ایکڑ کا یادگاری مرکز کیوں فروخت کر دیا گیا۔

ملک کی معیشت پر تبصرہ کرتے ہوئے اکھلیش یادو نے کہا کہ بھارت معاشی محاذ پر کئی سمتوں سے دباؤ کا سامنا کر رہا ہے۔ امریکہ بھارت کے ساتھ امتیازی سلوک کر رہا ہے، لیکن اس معاملے پر کوئی آواز نہیں اٹھا رہا۔ اس کے برعکس، امریکہ کے لیے تمام پابندیاں کھول دی گئی ہیں۔

انہوں نے خدشہ ظاہر کیا کہ اگر امریکی دودھ بھارتی بازار میں آنے لگا تو یہاں کے لوگوں کو نقصان پہنچے گا۔ اکھلیش یادو نے الزام لگایا کہ امریکہ اور چین بھارت کی منڈی پر قبضہ کرنے کی کوشش کر رہے ہیں۔

انہوں نے سوال کیا کہ ایسی صورتِ حال میں حکومت کی 'میک اِن انڈیا' اور 'ڈیجیٹل انڈیا' جیسی اسکیموں کا کیا ہوگا؟

ہندوستھان سماچار

---------------

ہندوستان سماچار / عبدالسلام صدیقی