اکھلیش یادو نے یہ باتیں جمعہ کو بلیا کے گوسائیں پور میں اتر پردیش اسمبلی کے سابق قائد حزب اختلاف آنجہانی رام گووند چودھری کو خراجِ عقیدت پیش کرنے کے بعد صحافیوں سے گفتگو کرتے ہوئے کہیں۔

انہوں نے کہا کہ سماج وادی پارٹی پرانے اتحاد کے سہارے اس بار اب تک کی سب سے زیادہ نشستیں حاصل کرے گی۔ 2027 میں تبدیلی ہونے جا رہی ہے اور اب اسمبلی انتخابات میں زیادہ وقت باقی نہیں رہ گیا ہے۔ سماج وادی پارٹی نے پوری تیاری کر لی ہے اور مختلف لوگوں کو ساتھ لا کر جوڑا ہے۔

اکھلیش یادو نے کہا کہ وہ بلیا کی سرزمین سے بات کر رہے ہیں، جو عظیم سماج وادی رہنماؤں کی سرزمین ہے اور جہاں سے سماج وادی نظریات نے جنم لیا ہے۔

انہوں نے کہا کہ اگر اتر پردیش میں بی جے پی دوبارہ انتخابات جیت گئی تو ملک میں انتخابات نہیں ہوں گے۔

بی جے پی پر الزام لگاتے ہوئے اکھلیش یادو نے کہا کہ اس کے لوگ افسران کے ذریعے عوام کو ڈرا رہے ہیں۔ بی جے پی نے اندرونی طور پر کئی سروے کرائے ہیں اور نہ جانے کتنے امیدواروں کے ٹکٹ کاٹے جائیں گے۔ انہوں نے سوال کیا کہ جن لوگوں کو بی جے پی میں شامل کیا جا رہا ہے، ان نشستوں پر پہلے سے موجود بی جے پی کارکنوں کا کیا ہوگا؟ ان کارکنوں میں ناراضی پیدا ہوگی، جس کا فائدہ سماج وادی پارٹی کو ملے گا۔

انہوں نے دعویٰ کیا کہ 2027 میں بی جے پی بچنے والی نہیں ہے اور عوام اسے اقتدار سے ہٹا دیں گے۔

چیف الیکشن کمشنر کے خلاف احتجاج پر کیا کہا؟

دہلی میں سی جے پی کی جانب سے چیف الیکشن کمشنر کے خلاف کیے گئے احتجاج میں شرکت کے سوال پر اکھلیش یادو نے کہا کہ جو لوگ بھی جمہوریت کو بچانے کے لیے سڑکوں پر اترے ہیں، سماج وادی پارٹی ان کا ساتھ دے گی۔ پارٹی کی اخلاقی حمایت ان کے ساتھ ہے۔

انہوں نے کہا کہ سماج وادی پارٹی نے 2022 میں ہی الزام لگایا تھا کہ الیکشن کمیشن نے امتیازی سلوک کیا اور ووٹروں کے نام فہرست سے کاٹنے کا کام کیا۔

اکھلیش یادو نے کہا کہ دوَاپر اور تریتا یُگ میں جن نند لال اور بھگوان رام نے لوگوں کی حفاظت کی، آج انہی کے ناموں کا استعمال کرتے ہوئے ووٹ کاٹے جا رہے ہیں۔

اے آئی ویڈیوز کے معاملے پر بی جے پی کو نشانہ بنایا

بی جے پی رہنماؤں کی مصنوعی ذہانت (اے آئی) کے ذریعے تیار کردہ ویڈیوز جاری کیے جانے کے معاملے پر اکھلیش یادو نے کہا کہ سب سے پہلے بی جے پی کے لوگوں نے ویڈیوز بنائے تھے، جس کے بعد سماج وادی کارکنوں نے مجبوری میں ویڈیوز تیار کیے۔

انہوں نے سہیل دیو بھارتیہ سماج پارٹی (سبھاسپا) کے سربراہ اور کابینہ وزیر اوم پرکاش راج بھر کے بارے میں کہا کہ وہ بی جے پی کی چال میں پھنس گئے ہیں۔

ہندوستھان سماچار

---------------

ہندوستان سماچار / عبدالسلام صدیقی