سوشل میڈیا پر ایک ویڈیو ہندی اور اردو متن کے ساتھ شیئر کی جا رہی ہے اور دعویٰ کیا جا رہا ہے کہ بی جے پی حکومت بننے کے بعد مغربی بنگال میں قربانی کے لئے غیر قانونی طریقے سے گائے فروخت کرنے آئے قصائیوں کو لوگوں نے پکڑ کر پولس کے حوالے کر دیا۔ ویڈیو میں ایک بھیڑ چند مسلم بزرگوں کو رسی سے باندھ کر زمین پر بٹھائے دکھائی دے رہے ہیں، جبکہ لوگ ان سے نام اور پتہ پوچھتے اور کان پکڑ کر اٹھک بیٹھک لگوانے پر مجبور کرتے نظر آتے ہیں۔

اس ویڈیو کو مغربی بنگال حکومت کی اس حالیہ ہدایت سے جوڑ کر شیئر کیا جا رہا ہے، جس میں عیدالاضحیٰ سے قبل بغیر ”ہیلتھ سرٹیفکیٹ” جانور ذبح کرنے پر پابندی عائد کی گئی ہے۔ ساتھ ہی کھلے مقامات پر جانوروں کے ذبح پر بھی روک لگانے اور خلاف ورزی کی صورت میں کاروائی کی تنبیہ کی گئی ہے۔

آرکائیو لنک

Fact Check/Verification

مغربی بنگال میں غیر قانونی طریقے سے گائے فروخت کرنے آئے قصائیوں کو لوگوں کے ذریعے پکڑے جانے کے دعوے کے ساتھ وائرل ویڈیو کی ہم نے تحقیقات کا آغاز کیا۔ سب سے پہلے ہم نے کیفریم کی مدد سے ریورس امیج سرچ کیا تو یہی ویڈیو کے ایکس اکاؤنٹ پر 3 اگست 2025 کو شیئر شدہ ملی۔ ویڈیو کے ساتھ فراہم کردہ معلومات کے مطابق یہ واقعہ مغربی بنگال کے درگاپور میں مسلم بچھڑا تاجروں کے ساتھ مارپیٹ کا ہے۔

اوپر ملی معلومات کی بنیاد پر کیورڈ سرچ کے دوران ہمیں انڈیا ٹوڈے کی ویب سائٹ پر 2 اگست 2025 کو شائع ہونے والی ایک رپورٹ ملی۔ رپورٹ میں وائرل ویڈیو سے جڑے مناظر بطور فیچر امیج موجود تھے۔ رپورٹ کے مطابق یہ واقعہ 31 جولائی 2025 کی شام پیش آیا تھا، جب مسلم برادری سے تعلق رکھنے والے کچھ لوگ بانکورہ ضلع کی ایک مارکیٹ سے بچھڑے کو کھیتی باڑی کے کام کے لئے لے جا رہے تھے۔

اسی دوران درگاپور کے گیمن برج کے قریب بی جے پی یوتھ ونگ سے وابستہ افراد نے ان لوگوں کو روک لیا۔ بچھڑے لے جا رہے افراد کے ساتھ مارپیٹ بھی کی اور انہیں کان پکڑ کر اٹھک بیٹھک کرنے پر مجبور کیا تھا۔ بعد میں درگاپور میں ترنمول کانگریس کے ضلعی صدر نے اس معاملے میں کوک اوون پولس اسٹیشن میں شکایت درج کرائی تھی۔ درگاپور پولس نے اس کیس میں دو افراد کو گرفتار کیا تھا، جن میں ایک بی جے پی یوا مورچہ کا رکن بھی شامل تھا۔