فلپائن میں حالیہ شدید زلزلے کے بعد سوشل میڈیا پر سترہ سیکنڈ کی ایک ویڈیو وائرل ہو رہی ہے، جس میں دو فلک بوس عمارتوں کو جوڑنے والا پل نما حصہ ٹوٹتا ہوا نظر آ رہا ہے۔ دعویٰ کیا جا رہا ہے کہ ویڈیو میں دکھائے گئے مناظر فلپائن کے زلزلے کے باعث ہونے والی تباہی کے ہیں۔
بروز منگل، 8 جون 2026، اقوام متحدہ کی ایک رپورٹ کے مطابق فلپائن کے صوبہ سارانگانی کے ساحل کے قریب سمندر میں مقامی وقت کے مطابق صبح 7 بج کر 37 منٹ پر 7.8 شدت کا زلزلہ آیا، جس کے نتیجے میں اب تک 19 افراد ہلاک اور 134 زخمی ہو چکے ہیں۔
Fact Check/Verification
فلپائن کے شدید زلزلے سے جوڑ کر شیئر کی گئی ویڈیو کے ایک فریم کو گوگل لینس کی مدد سے ریورس سرچ کیا۔ اس دوران ہمیں دو فلک بوس عمارتوں کو جوڑنے والے حصے کے ٹوٹنے کی یہی ویڈیو 30 مارچ 2025 کو “آرکیٹیک اینڈ ڈیزائن” نامی انسٹاگرام پیج پر شیئر شدہ ملی۔ فراہم کردہ معلومات کے مطابق یہ مناظر میانمار میں آنے والے 7.7 شدت کے زلزلے کے بعد تھائی لینڈ کے بینکاک میں دو بلند رہائشی عمارتوں کو جوڑنے والے پل نما حصے کے منہدم ہونے کے ہیں۔
یہی ویڈیو اے بی سی نیوز آسٹریلیا نامی یوٹیوب چینل پر 29 مارچ 2025 کو اپلوڈ شدہ ملی۔ جس کے مطابق میانمار میں آنے والے زلزلے کے نتیجے میں پیدا ہونے والے جھٹکوں کے باعث تھائی لینڈ کے دارالحکومت بینکاک کے علاقے تھونگ لور میں موجود دو لگژری رہائشی عمارتوں کو جوڑنے والا پل نما حصہ منہدم ہوگیا تھا۔
اس حوالے سے سی این این اور دی نیشن تھائی لینڈ کی ویب سائٹس پر 28 اور 29 مارچ 2025 کو شائع ہونے والی رپورٹس بھی ملیں۔ دی نیشن تھائی لینڈ کے مطابق میانمار میں آنے والے شدید زلزلے کے اثرات کے باعث بینکاک کے علاقے تھونگ لور میں واقع تقریباً 30 منزلہ لگژری رہائشی منصوبے میں دو عمارتوں کو جوڑنے والا پل نما حصہ منہدم ہوگیا تھا۔
Conclusion
اس طرح نیوز چیکر کی تحقیق سے یہ ثابت ہوا کہ وائرل ویڈیو فلپائن کے زلزلے کی نہیں بلکہ بینکاک کی ہے، جہاں شدید زلزلے کے باعث دو عمارتوں کو جوڑنے والا پل نما حصہ منہدم ہوگیا تھا۔
Our Sources
Instagram post by @architectanddesign on 30 Mar 2025
Video published by YouTube Channel ABC News Australia on 29 Mar 2025
Reports published by The Nation Thailand and CNN World on 28,29 Mar 2025