برطانیہ میں سیاسی تبدیلیوں اور حکومتی اتار چڑھاؤ کے درمیان اگر کوئی ایک شخصیت مسلسل خبروں میں جگہ بناتی رہی ہے تو وہ کوئی سیاست دان، وزیر یا سرکاری عہدیدار نہیں بلکہ ایک ۱۹؍ سالہ ٹیبی بلی ہے جسے دنیا ''لیری دی کیٹ'' کے نام سے جانتی ہے۔ برطانوی وزیر اعظم کیئر اسٹارمر کے پیر، ۲۲؍ جون کو استعفے کے اعلان کے بعد ایک بار پھر عوامی اور سوشل میڈیا توجہ کا مرکز لیری بن گئی، جو گزشتہ پندرہ برسوں سے ۱۰؍ ڈاؤننگ اسٹریٹ میں مقیم ہے۔ لیری کو سرکاری طور پر ''چیف ماؤزر ٹو دی کیبنٹ آفس'' کا اعزازی عہدہ حاصل ہے اور وہ ۲۰۱۱ء میں Battersea Dogs & Cats Home سے ڈاؤننگ اسٹریٹ لائی گئی تھی۔

If rumours are to be believed I`ll be living with a seventh different Prime Minister shortly. If it carries on like this I`m going to stop making the effort to learn their names.

اس عرصے کے دوران لیری نے برطانوی سیاست کے کئی اہم ادوار اپنی آنکھوں سے دیکھے ہیں۔ وہ سابق وزیر اعظم ڈیوڈ کیمرون کے دور میں ڈاؤننگ اسٹریٹ پہنچی، اس کے بعد تھریسا مے، بورس جانسن، لِز ٹرس، رشی سونک اور کیئر اسٹارمر سمیت چھ وزرائے اعظم کی آمد و رفت کی گواہ رہی۔ اب قیاس آرائی کی جا رہی ہے کہ وہ جلد ہی ساتویں وزیر اعظم کا استقبال کرے گی۔ اپنے مخصوص طنزیہ انداز میں لیری نے سوشل میڈیا پر لکھا کہ ''اگر افواہوں پر یقین کیا جائے تو میں جلد ہی ساتویں مختلف وزیر اعظم کے ساتھ رہوں گا۔ اگر یہ سلسلہ اسی طرح جاری رہا تو شاید میں ان کے نام یاد رکھنے کی کوشش ہی چھوڑ دوں۔''

یہ تبصرہ سوشل میڈیا پر تیزی سے وائرل ہوگیا، جہاں ہزاروں صارفین نے اسے برطانوی سیاست کی غیر یقینی صورتحال پر ایک دلچسپ تبصرہ قرار دیا۔ لیری نے ایک اور مزاحیہ پوسٹ میں دعویٰ کیا کہ اس نے کیئر اسٹارمر کا استعفیٰ قبول کر لیا ہے۔ اس نے لکھا کہ ''میں نے اپنے چیف ملازم کی حیثیت سے کیئر اسٹارمر کا استعفیٰ قبول کر لیا ہے اور اینڈی برنہم کو مدعو کیا ہے کہ وہ مجھے بتائیں کہ وہ روزانہ کتنے کھانے فراہم کریں گے۔'' اگرچہ اس بیان کی نہ تو بکنگھم پیلس، نہ اینڈی برنہم اور نہ ہی کسی سرکاری ادارے نے تصدیق کی، تاہم سوشل میڈیا صارفین نے اسے خوب پسند کیا اور مزاحیہ تبصروں کا سلسلہ شروع ہو گیا۔

لیری کی مقبولیت صرف اس کی طویل موجودگی کی وجہ سے نہیں بلکہ اس کے سوشل میڈیا اکاؤنٹس پر جاری ہونے والے طنزیہ سیاسی تبصروں کی وجہ سے بھی ہے، جو اکثر برطانوی سیاست کے اتار چڑھاؤ پر ہلکے پھلکے انداز میں روشنی ڈالتے ہیں۔ سیاسی مبصرین کا کہنا ہے کہ لیری اب برطانوی سیاسی ثقافت کا ایک منفرد حصہ بن چکی ہے۔ ڈیوڈ کیمرون سے لے کر کیئر اسٹارمر تک مسلسل چھ مختلف وزرائے اعظم کے ادوار دیکھنے کے بعد اسے برطانیہ کی سب سے تجربہ کار ''سیاسی مبصر بلی'' بھی قرار دیا جاتا ہے۔

بہت سے سوشل میڈیا صارفین نے مذاقاً لکھا کہ لیری نے بعض سرکاری ملازمین سے زیادہ قیادت کی تبدیلیاں دیکھی ہیں، جبکہ کچھ نے اسے ''برطانیہ کی سب سے مستقل سرکاری شخصیت'' قرار دیا۔ اگرچہ برطانیہ کی سیاست ایک مرتبہ پھر نئے دور میں داخل ہونے جا رہی ہے، لیکن ایک چیز تقریباً یقینی نظر آتی ہے: ۱۰؍ ڈاؤننگ اسٹریٹ میں لیری کی موجودگی برقرار رہے گی، چاہے وزیراعظم کوئی بھی ہو۔