भोपाळ (मध्य प्रदेश): मॉडेल ट्विशा हिच्या मृत्यूनंतर खळबळ उडाली असून, तिने स्वत:ला संपवलं नाही तर तिची हत्या करण्यात आल्याचा आरोप ट्विशाच्या कुटुंबियांनी केला आहे. सीसीटीव्ही फुटेज आणि इतर WhatsApp, सोशल मिडिया अॅपवर असलेल्या चॅट्समधून देखील ट्विशा ही भीतीखाली होती असे दिसत असल्याचा दावा कुटुंबियांनी केला आहे.

भोपाळमधील ट्विशा शर्मा (वय ३१) मृत्यू प्रकरणी अनेक धक्कादायक खुलासे समोर येत आहेत. सोशल मीडिया प्लॅटफॉर्मवर तिच्या मृत्यूच्या काही वेळ आधीचे आणि नंतरचे सीसीटीव्ही फुटेज व्हायरल झाले आहे. या मृत्यूमुळे संपूर्ण परिसरात संतापाची लाट असून, हुंड्यासाठी तिचा छळ केल्याचा आरोप मुलीच्या कुटुंबीयांनी केला.

व्हायरल झालेल्या व्हिडिओमध्ये ट्विशा घटनेच्या काही वेळ आधी घराच्या छताकडे जाताना दिसत आहे. यानंतर, साधारण एका तासानंतर तिचा पती समर्थ सिंग आणि इतर दोन जण तिला जिन्यावरून खाली घेऊन जाताना दिसत आहेत. जिन्यावरच तिला शुद्धीवर आणण्यासाठी सीपीआर देण्याचा प्रयत्नही केला जात असल्याचे व्हिडिओमध्ये दिसत आहे. दरम्यान, ट्विशाच्या सासू आणि निवृत्त न्यायाधीश गिरीबाला सिंग यांनी हे सगळे आरोप फेटाळून लावले आहेत. ट्विशा ही मानसोपचारतज्ज्ञांकडून उपचार घेत होती. तिला सिजोफ्रेनिया या गंभीर मानसिक आजाराची औषधं दिली जात होती. औषधं घेतल्यावर ती एक दिवस बरी असायची, पण नंतर पुन्हा तिची प्रकृती बदलायची. तिचे हात थरथरायचे, ती गांजाही ओढायची, अशी कबुली तिने दिली होती. आपला मुलगा समर्थ हा एक सक्षम वकील असून त्याने कधीही अंमली पदार्थांचे सेवन केले नसल्याचा दावाही त्यांनी केला.”