ডিজিটেল ডেস্ক: আজিৰ ব্যস্ত আৰু চাপপূর্ণ জীৱনত মানসিক উদ্বেগ, অনিদ্ৰা, অস্থিৰতা আদি সমস্যা দিনে দিনে অভাৱনীয় হাৰত বৃদ্ধি পাইছে। এই সমস্যাবোৰৰ পৰা মুক্তি পাবলৈ বহুতে ধ্যান, যোগ, ব্যায়াম তথা শ্বাস-প্ৰশ্বাসৰ অনুশীলন কৰে। তেনে এক সহজ কিন্তু অত্যন্ত ফলপ্ৰসূ পদ্ধতি হ'ল 'হামিং' বা গুনগুনাই শব্দ কৰা। ই এক প্ৰাকৃতিক উপায়, যিয়ে মন আৰু শৰীৰ দুয়োটাকে শান্ত আৰু সুস্থ ৰখাত সহায় কৰে।

হামিং কি ?

হামিং মানে মুখ বন্ধ কৰি একেবাৰে সৰু আৰু কোমলকৈ 'ম্মম…' ধৰণৰ শব্দ উলিওৱা। এই শব্দৰ কম্পনে শৰীৰ আৰু মগজুত ইতিবাচক প্ৰভাৱ পেলায়। সাধাৰণতে ধ্যান, যোগ আৰু শ্বাস-প্ৰশ্বাসৰ অনুশীলনত হামিং ব্যৱহাৰ কৰা হয়। হামিং কৰাৰ ফলত হোৱা স্বাস্থ্য উপকাৰিতাসমূহ হৈছে-

মানসিক চাপ আৰু উদ্বেগ হ্ৰাস

হামিঙৰ আটাইতকৈ ডাঙৰ উপকাৰ হ’ল ই মানসিক চাপ আৰু উদ্বেগ হ্ৰাস কৰে। গুনগুননি শব্দই মগজুক শান্ত কৰে আৰু চিন্তাৰ গতি ধীৰ কৰে। ফলত মনত এক প্ৰকাৰ স্বস্তি আৰু শান্তি অনুভৱ হয়।

উন্নত শ্বাস-প্ৰশ্বাস

হামিং কৰাৰ সময়ত নিশ্বাস ধীৰ আৰু গভীৰ হয়। ইয়াৰ ফলত শৰীৰত অধিক অক্সিজেন প্ৰৱেশ কৰে আৰু মনোযোগ বৃদ্ধি পায়। ধীৰ শ্বাস-প্ৰশ্বাসে হৃদস্পন্দনো নিয়ন্ত্ৰণত ৰাখে।

নাইট্ৰিক অক্সাইড বৃদ্ধি

গৱেষণাৰ মতে, হামিং কৰিলে নাকৰ ভিতৰত নাইট্ৰিক অক্সাইডৰ উৎপাদন বৃদ্ধি পায়। এই গেছটোৱে শ্বাস-প্ৰশ্বাসৰ পথ মুকলি কৰাত সহায় কৰে আৰু সহজে নিশ্বাস ল’ব পৰা অৱস্থা সৃষ্টি কৰে। ছাইনাছ বা নাক বন্ধ হৈ থকা লোকৰ বাবে ই বিশেষ উপকাৰী।

ভেগাছ স্নায়ুৰ উদ্দীপনা

হামিঙে 'Vagus Nerve' বা ভেগাছ স্নায়ুক উদ্দীপিত কৰে। এই স্নায়ু শৰীৰৰ Relaxation System-ৰ সৈতে জড়িত। ইয়াৰ ফলত উদ্বেগ কমে, মন শান্ত হয় আৰু শৰীৰে বিশ্ৰাম অনুভৱ কৰে।

টোপনি আৰু একাগ্ৰতা বৃদ্ধি

নিয়মিত হামিং কৰিলে টোপনিৰ গুণগত মান উন্নত হয়। ই মনক শান্ত কৰি ধ্যানৰ দৰে অনুভূতি সৃষ্টি কৰে। ফলত একাগ্ৰতা আৰু মনোযোগো বৃদ্ধি পায়।

হামিং কৰাৰ সহজ পদ্ধতি

১. এটুকুৰা শান্ত ঠাইত আৰামকৈ বহক।
২. নাকেৰে দীঘলকৈ নিশ্বাস লওক।
৩. নিশ্বাস এৰি দিয়াৰ সময়ত 'ম্মম…' শব্দ কৰক।
৪. শব্দটো ধীৰ আৰু কোমলভাৱে কৰিব।
৫. এইদৰে নিয়মিত ২-৫ মিনিট অনুশীলন কৰক।