Vadodara News : વડોદરા (Vadodara)ની સૌથી મોટી સરકારી હોસ્પિટલ સયાજી હોસ્પિટલ (Sayaji Hospital) હવે પોતાના પરિસરમાંથી નીકળતા સોલિડ વેસ્ટનું પ્રોસેસિંગ જાતે જ કરશે.
સુપ્રીમ કોર્ટની નવી માર્ગદર્શિકા મુજબ હોસ્પિટલને 'બલ્ક વેસ્ટ જનરેટર' (Bulk Waste Generator) તરીકે સામેલ કરવામાં આવી છે. જેના પગલે હોસ્પિટલમાં ઉત્પન્ન થતા સામાન્ય ઘન કચરાના વૈજ્ઞાનિક નિકાલ માટે નવી ઇન-હાઉસ વ્યવસ્થા ઊભી કરવામાં આવશે.
દરરોજ હજારો દર્દીઓ સારવાર માટે આવતા હોવાથી સયાજી હોસ્પિટલમાં મોટા પ્રમાણમાં મેડિકલ વેસ્ટ તેમજ સોલિડ વેસ્ટ (Solid Waste)ઉત્પન્ન થાય છે. અત્યાર સુધી બાયો-મેડિકલ વેસ્ટનું સંચાલન નિયુક્ત એજન્સી દ્વારા કરવામાં આવતું હતું, જ્યારે સોલિડ વેસ્ટ વડોદરા મહાનગરપાલિકાને સોંપવામાં આવતો હતો. હવે નવી ગાઇડલાઇન અનુસાર હોસ્પિટલને સોલિડ વેસ્ટનું પ્રોસેસિંગ પોતાના કેમ્પસમાં જ કરવું પડશે.
આ નવી વ્યવસ્થાના અમલીકરણને લઈને વડોદરા મહાનગરપાલિકા (VMC)ના અધિકારીઓએ સયાજી હોસ્પિટલની મુલાકાત લીધી હતી. બેઠક દરમિયાન હોસ્પિટલના અધિકારીઓ સાથે રજિસ્ટ્રેશન પ્રક્રિયા, વેસ્ટ મેનેજમેન્ટ પ્લાન અને ભવિષ્યમાં ઊભી થનારી સુવિધાઓ અંગે ચર્ચા કરવામાં આવી હતી.
વડોદરા મ્યુનિસિપલ કમિશનર વી. એમ. રાજપૂતે જણાવ્યું હતું કે સુપ્રીમ કોર્ટની ગાઇડલાઇન મુજબ સયાજી હોસ્પિટલ હવે બલ્ક વેસ્ટ જનરેટર (Bulk Waste Generator)ની શ્રેણીમાં આવે છે. તેથી હોસ્પિટલને જરૂરી નોંધણી કરાવી સોલિડ વેસ્ટ (Solid Waste)નું વૈજ્ઞાનિક રીતે પ્રોસેસિંગ કરવાની પ્રક્રિયા શરૂ કરવી પડશે.
સયાજી હોસ્પિટલના સુપરિટેન્ડેન્ટ ડૉ. રંજન ઐયરે જણાવ્યું હતું કે બાયો-મેડિકલ વેસ્ટનો નિકાલ અગાઉની જેમ અધિકૃત એજન્સી દ્વારા જ કરવામાં આવશે. પરંતુ હવે સોલિડ વેસ્ટ માટે હોસ્પિટલ પરિસરમાં જ નવી પ્રોસેસિંગ સુવિધા ઊભી કરીને કચરાના યોગ્ય નિકાલની વ્યવસ્થા કરવામાં આવશે.
નવી વ્યવસ્થા અમલમાં આવતા હોસ્પિટલમાં કચરા વ્યવસ્થાપન વધુ સુવ્યવસ્થિત બનશે, પર્યાવરણનું સંરક્ષણ થશે અને સ્વચ્છતા જાળવવામાં પણ મદદ મળશે.
NABH ટીમની મુલાકાત પહેલાં સયાજી હોસ્પિટલમાં સુપરિન્ટેન્ડન્ટની ઓચિંતી તપાસમાં બહાર આવી મોટી ખામીઓ
GPCB દ્વારા 'સોલિડ વેસ્ટ મેનેજમેન્ટ રૂલ્સ, 2026' વિષયક રાજ્યસ્તરીય વેબિનારનું આયોજન