- સુપ્રીમ કોર્ટના આદેશ બાદ રાજ્યમાં તેના અમલની તૈયારીઓ શરૂઃ ડીલરો પણ 10 દિવસ સુધી વેચી શકશે

- અનેક લોકોએ BS-4 વાહનો ખરીદ્યા બાદ લોકડાઉન આવી જતાં રજિસ્ટ્રેશન બાકી રહી ગયું હતું

નવગુજરાત સમય > અમદાવાદ

રાજ્યમાં ૩૧ માર્ચ સુધી BS-4 વાહનોનું રજિસ્ટ્રેશન કરવામાં આવનાર હતું.

પરંતુ સમગ્ર દેશમાં લોકડાઉનની સ્થિતિના પગલે જે વાહનચાલકોએ BS-4 વાહન ખરીદી લીધા હશે પરંતુ તેનું રજિસ્ટ્રેશન બાકી હશે તેમને ૩૧ માર્ચ પછી પણ રજિસ્ટ્રેશનની મંજૂરી અપાશે. આ મુદ્દે સુપ્રીમ કોર્ટ દ્વારા ચુકાદો આવ્યા બાદ હવે ગુજરાતમાં પણ તેનો અમલ કરાશે. આ ઉપરાંત લોકડાઉન ખુલ્યા બાદ ૧૦ દિવસ સુધી ડીલરો BS-4 વાહનોનું વેચાણ કરી શકશે તેવું પણ સુપ્રીમ કોર્ટે ચુકાદામાં કહ્યું હોઈ ડીલરોને પણ રાહત થઈ છે.

સુપ્રીમ કોર્ટ દ્વારા સમગ્ર દેશમાં BS-4 વાહનોના વેચાણ અને રજિસ્ટ્રેશન માટે ૩૧ માર્ચ, ૨૦૨૦ની છેલ્લી મુદ્દત અપાઈ હતી. આ મુદ્દત બાદ દેશમાં કોઈપણ BS-4 વાહનનું વેચાણ કે રજિસ્ટ્રેશન નહીં થાય તેમ સ્પષ્ટ જણાવાયું હતું. જેના પગલે ગુજરાતના વાહન વ્યવહાર વિભાગ દ્વારા પણ પરિપત્ર કરી રાજ્યમાં ૩૧ માર્ચ સુધી જ BS-4 વાહનોના વેચાણની મંજૂરી અપાઈ હતી અને રજિસ્ટ્રેશન આ સમયગાળા દરમિયાન જ કરી લેવા તાકીદ કરવામાં આવી હતી.

જોકે, સમગ્ર દેશ કોરોના વાયરસના ભરડામાં આવી જતાં લોકડાઉનની સ્થિતિ ઉદભવી હતી અને હાલમાં સમગ્ર દેશ લોકડાઉન છે ત્યારે BS-4 વાહનોને લઈને ભારે મુંઝવણ હતી. જેને લઈને ડીલરો દ્વારા સુપ્રીમ કોર્ટમાં અરજી કરવામાં આવી હતી અને મુદ્દત વધારવામાં આવે તે માટે જણાવાયું હતું. જેના પગલે સુપ્રીમ કોર્ટ દ્વારા વીડિયો કોન્ફરન્સથી આ કેસની સુનાવણી કરવામાં આવી હતી અને ચુકાદામાં છૂટછાટ આપવામાં આવી હતી. જેનો અમલ આગામી દિવસોમાં ગુજરાતમાં થશે તેમ સૂત્રોએ જણાવ્યું હતું.

દેશમાં ૩૧ માર્ચ સુધી BS-4 વાહનોના વેચાણની છુટ હતી. જોકે, લોકડાઉનની સ્થિતિના પગલે તેમાં સામાન્ય છુટ અપાઈ છે. જે મુજબ લોકડાઉન પૂર્ણ થયા બાદ ડીલરો પોતાની પાસે રહેલા BS-4ના સ્ટોકમાંથી ૧૦ ટકા જેટલા વાહનો ૧૦ દિવસમાં વેચી શકશે તેવી છુટ અપાઈ છે. આ ઉપરાંત જે BS-4 વાહનો લોકોએ ખરીદી લીધા છે અને લોકડાઉનની સ્થિતિના પગલે વાહનોનું નિયત સમયમાં રજિસ્ટ્રેશન કરાવી શક્યા નથી તેઓ ૩૧ માર્ચ પછી પણ રજિસ્ટ્રેશન કરાવી શકશે.