મળતી માહિતી મુજબ, નરોડા પોલીસ સ્ટેશનમાં દારૂબંધી (પ્રોહિબિશન)ના કાયદા હેઠળ નોંધાયેલા એક ગુનામાં આરોપી બૂટલેગર મહંમદ હારૂન જબ્બાર શેખ અને અન્ય આરોપીઓ વોન્ટેડ છે. વાયરલ થયેલી ઓડિયો ક્લિપમાં કોન્સ્ટેબલ જનકભાઈ આ લિસ્ટેડ બૂટલેગર સાથે સતત સંપર્કમાં રહી ઉપરી અધિકારીઓના નામો વટાવી 3.50 લાખ રૂપિયા પોતાના અંગત આર્થિક ફાયદા સારું વાતચીત કરી રહ્યા હોવાનું પ્રાથમિક તારણ નીકળ્યું છે. સામે બૂટલેગર 1.50 લાખ આપવાની તૈયારી દર્શાવી રહ્યો હતો. આ વીડિયો બાદ પોલીસ ખાતાની છબિ ખરડાય તેવું શંકાસ્પદ કૃત્ય કરનાર કર્મચારી સામે કડક વલણ અપનાવવામાં આવ્યું છે. તાત્કાલીક અસરથી જનકભાઇ પુંજાભાઇને સસ્પેન્ડ કરી સમગ્ર પ્રકરણની તટસ્થ અને ન્યાયિક તપાસ થાય તે માટે મદદનીશ પોલીસ કમિશનર જી ડિવિઝનને પ્રાથમિક તપાસ સોંપવામાં આવી છે.