સોલા પોલીસના પીઆઈ કે.એન.ભૂકણ અને પીએસઆઈ એસ.જે. દેસાઈને મળેલી બાતમીને આધારે રાત્રે એક વાગ્યે વૈષ્ણોદેવી બ્રિજ ઉતરતા નિરમા યુનિવર્સિટી સામે વોચ ગોઠવી હતી. આ દરમિયાન શંકાસ્પદ ક્રેટા કારને રોકી તપાસ કરતાં તેમાંથી ભારતીય બનાવટના વિદેશી દારૂ અને બિયરની 1800 બોટલ મળી આવી હતી. કારમાં ખોટી નંબર પ્લેટ પણ લગાવાઈ હતી.

પોલીસે કારચાલક ચેતન માળી (ઉં.વ. 44, રહે. ડીસા)ની ધરપકડ કરી પૂછપરછ કરતાં દારૂનો જથ્થો રાણીપના જીતુ રાવળ ઉર્ફે જયઅંબેના કહેવાથી શામળાજી બોર્ડરથી લવાયો હોવાનું કબૂલ્યું હતું. આ દારૂનો જથ્થો ગુલબાઈ ટેકરા ખાતે રહેતી સોનલ નામની વ્યક્તિને પહોંચાડવાનો હતો. પોલીસે દારૂ મગાવનાર અને મેળવનાર સહિત ત્રણ સામે ગુનો નોંધી વધુ તપાસ હાથ ધરી છે. ઉલ્લેખનીય છે કે અમદાવાદ પોલીસ કમિશનર કચેરીએ શહેરના તમામ પોલીસ સ્ટેશનમાં દિવાળી દરમિયાન દારૂ-જુગાર અને અન્ય નશીલા પદાર્થોનો વેપલો કે હેરાફેરી થાય નહીં તેની તકેદારી માટે ખાસ સૂચના આપી છે અને પોલીસે સઘન પેટ્રોલિંગ પણ શરૂ કરી દીધું છે.