નવરાત્રીના આઠમના પાવન દિવસે ફેસ્ટિવલના ગરબા ગ્રાઉન્ડ ખાતે 1,008 દીવડાની ભવ્ય મહાઆરતી યોજાઈ હતી. આ મહાઆરતીમાં મોટી સંખ્યામાં શ્રદ્ધાળુઓ અને ખેલૈયાઓ જોડાયા હતા. દીવડાઓના પ્રકાશ અને માતાજીની આરતીથી સમગ્ર વાતાવરણ ભક્તિમય બની ગયું હતું. ઉપસ્થિત લોકોએ શ્રદ્ધા અને ઉત્સાહ સાથે મા આધ્યશક્તિની આરાધના કરી હતી.

હિન્દુ ધર્મમાં નવરાત્રીની આઠમનું વિશેષ મહત્ત્વ છે. આ દિવસે વિવિધ સ્થળોએ માતાજીની પૂજા-અર્ચના, હવન અને ધાર્મિક વિધિઓ યોજવામાં આવે છે. કરજણ નવરાત્રી ફેસ્ટિવલમાં પણ 1,008 દીવડાની મહાઆરતી દ્વારા ભક્તિભાવ અને ધાર્મિક પરંપરાનું સુંદર દૃશ્ય જોવા મળ્યું હતું.

આ પ્રસંગે કરજણ-શિનોર-પોરના ધારાસભ્ય અક્ષય પટેલ, જિલ્લા ભાજપ મહામંત્રી જયદીપસિંહ ચૌહાણ સહિત ભાજપના હોદ્દેદારો ઉપસ્થિત રહ્યા હતા. આ ઉપરાંત વિશ્વ હિન્દુ પરિષદ અને રાષ્ટ્રીય સ્વયંસેવક સંઘ (RSS)ના હોદ્દેદારો તેમજ મોટી સંખ્યામાં ખેલૈયાઓ અને શ્રદ્ધાળુઓએ મહાઆરતીમાં ભાગ લીધો હતો. સૌએ સાથે મળીને માતાજીની આરતી ઉતારી આઠમના પવિત્ર પર્વની ઉજવણી કરી હતી.

દરરોજ 7,000થી વધુ ખેલૈયાઓ કરે છે રાષ્ટ્રગીતનું સામૂહિક ગાન

કરજણ નવરાત્રી ફેસ્ટિવલની વિશેષતા માત્ર ગરબા અને રાસ પૂરતી મર્યાદિત નથી. અહીં ધાર્મિક આસ્થા સાથે દેશભક્તિ અને રાષ્ટ્રીય એકતાને પણ વિશેષ મહત્ત્વ આપવામાં આવે છે. ફેસ્ટિવલમાં દરરોજ 7,000થી વધુ ખેલૈયાઓ સામૂહિક રીતે રાષ્ટ્રગીતનું ગાન કરે છે.

આ પહેલ દ્વારા દેશની એકતા અને અખંડિતતાનો સંદેશ આપવામાં આવી રહ્યો છે. નવરાત્રીના પવિત્ર માહોલમાં હજારો ખેલૈયાઓ એકસાથે રાષ્ટ્રગીત ગાઈને દેશપ્રેમ, રાષ્ટ્રીય ગૌરવ અને સામૂહિક એકતાની ભાવનાને ઉજાગર કરે છે. ભારત દેશ સતત પ્રગતિના પંથે આગળ વધે તેવી પ્રાર્થના પણ કરવામાં આવે છે.

શ્રી રંગનાથ ફાઉન્ડેશન દ્વારા આયોજિત આ મહોત્સવ કરજણમાં ધાર્મિક ઉત્સાહ અને સાંસ્કૃતિક પરંપરાને નવી ઊંચાઈ આપી રહ્યો છે. 1,008 દીવડાની મહાઆરતી અને દરરોજ 7,000થી વધુ ખેલૈયાઓના રાષ્ટ્રગીતના સામૂહિક ગાન સાથે કરજણ નવરાત્રી ફેસ્ટિવલમાં ભક્તિ, સંસ્કૃતિ, રાષ્ટ્રપ્રેમ અને એકતાનો ત્રિવેણી સંગમ જોવા મળી રહ્યો છે.