ગાંધીનગર શહેરને પ્રદૂષણમુક્ત અને સ્માર્ટ સિટી બનાવવાના પ્રયાસોના ભાગરૂપે દોડાવવામાં આવતી આ ઈ-બસો રક્ષાબંધનના દિવસે સવારથી જ પોતાના નિર્ધારિત રૂટ પર રાબેતા મુજબ કાર્યરત રહેશે. શહેરના વિવિધ વિસ્તારોને જોડતા તમામ ઈ-બસ રૂટ પર મહિલા મુસાફરો કોઈપણ પ્રકારની ટિકિટ લીધા વિના મફત મુસાફરી કરી શકશે. આ વિશેષ સુવિધા દ્વારા બહેનો પોતાના ભાઈઓ સાથે તહેવારની હર્ષોલ્લાસભેર ઉજવણી કરી શકશે. ગાંધીનગર મહાનગરપાલિકા શહેરની તમામ મહિલા નાગરિકોને અપીલ કરે છે કે તેઓ રક્ષાબંધનના આ પવિત્ર અવસરે પર્યાવરણને અનુકૂળ એવી આ પબ્લિક ટ્રાન્સપોર્ટ સેવાનો મહત્તમ લાભ ઉઠાવે અને સુરક્ષિત મુસાફરીનો આનંદ માણે.

રક્ષાબંધનના પવિત્ર દિવસે બહેનો કોઈપણ પ્રકારની મુશ્કેલી કે આર્થિક બોજ વિના સરળતાથી પોતાના ભાઈના ઘરે પહોંચી શકે તે માટે GMC દ્વારા શહેરની બહેનો માટે અત્યંત સરાહનીય અને રાહતરૂપ ભેટ જાહેર કરવામાં આવી છે. મ્યુનિસિપલ કોર્પોરેશનના આ સંવેદનશીલ અને પ્રજાભિમુખ નિર્ણયથી સમગ્ર પાટનગરની મહિલાઓમાં ખુશીની લહેર જોવા મળી રહી છે.