Trishul News Gujarati

Health tips for diabetes: આજના સમયની બેઠાડુ જીવનશૈલી અને ખોટા ખાનપાનને કારણે ડાયાબિટીસ હવે માત્ર મોટી ઉંમરની બીમારી રહી નથી. તે ધીમે ધીમે (Health tips for diabetes) યુવાનોને પણ પોતાની ઝપેટમાં લઈ રહ્યો છે. ડાયાબિટીસ ક્યારેય અચાનક થતો નથી, તે હંમેશા 'પ્રી-ડાયાબિટીસ'ના તબક્કામાંથી પસાર થાય છે. જો સમયસર શરીર દ્વારા આપવામાં આવતા આ સંકેતોને ઓળખી લેવામાં આવે, તો તમે આ ગંભીર બીમારીના ખતરાને ટાળી શકો છો.

રૂઝ ન આવતી ઈજા અને વારંવાર ઈન્ફેક્શન
જ્યારે લોહીમાં શુગરનું સ્તર વધે છે, ત્યારે તે શરીરની રક્તવાહિનીઓને નુકસાન પહોંચાડે છે અને રક્ત પરિભ્રમણ ધીમું પાડે છે. જો તમને વારંવાર શરદી, યુરિન ઈન્ફેક્શન કે પેઢામાં સોજા આવતા હોય, અથવા કોઈ નાની એવી ઈજાને મટતા પણ ઘણા દિવસો લાગતા હોય, તો તે બ્લડ શુગર વધવાનો સ્પષ્ટ સંકેત છે.

વારંવાર પેશાબ જવાની સમસ્યા અને વધુ તરસ લાગવી
બ્લડમાં વધારાની શુગરને ફિલ્ટર કરવા માટે કિડનીએ વધુ મહેનત કરવી પડે છે, જે તેને પેશાબ વાટે બહાર કાઢે છે. જો તમારે રાત્રે વારંવાર વોશરૂમ જવા માટે ઉઠવું પડતું હોય, તો તે કિડની પરના દબાણનો સંકેત છે. આ પ્રક્રિયામાં શરીરમાં પાણીની અછત સર્જાય છે (ડિહાઇડ્રેશન), જેના કારણે ગળું વારંવાર સુકાય છે અને અતિશય તરસ લાગે છે.

સતત થાક અને નબળાઈનો અનુભવ
તમારું શરીર જે ખોરાક લે છે તેને ગ્લુકોઝ દ્વારા ઉર્જામાં ફેરવવામાં જ્યારે નિષ્ફળ જાય, ત્યારે તમને ભારે થાક લાગે છે. જો પૂરતી ઊંઘ અને આરામ લીધા પછી પણ તમને શરીરમાં સ્ફૂર્તિ ન જણાય અને સતત સુસ્તી રહેતી હોય, તો તે ઇન્સ્યુલિન રેઝિસ્ટન્સ અથવા પ્રી-ડાયાબિટીસના લક્ષણો હોઈ શકે છે.

વજનમાં અચાનક વધારો કે ઘટાડો
તમારી ડાયેટમાં કોઈ મોટો ફેરફાર ન હોવા છતાં જો અચાનક વજન વધવા લાગે કે ઝડપથી ઘટવા લાગે, તો સાવચેત રહેવું જોઈએ. જ્યારે કોષો ગ્લુકોઝને યોગ્ય રીતે શોષી શકતા નથી, ત્યારે શરીર ઉર્જા માટે સ્નાયુઓ અને ફેટને તોડવાનું શરૂ કરે છે, જેના કારણે વજનમાં અનિયંત્રિત ફેરફાર જોવા મળે છે.